Read Ang Bagong Ang Biblia Psalms 19 Bible Online

Psalms 19 - Ang Bagong Ang Biblia bible

Psalms 19

¹ Nagpapahayag ng kaluwalhatian ng Diyos ang kalangitan, at ang mga gawa ng kanyang kamay ay inihahayag ng kalawakan.

² Sa araw-araw ay nagsasalita, at gabi-gabi ay nagpapahayag ng kaalaman.

³ Walang pananalita o mga salita man; ang kanilang tinig ay hindi narinig.

⁴ Ngunit lumalaganap sa buong lupa ang kanilang tinig, at ang kanilang mga salita ay hanggang sa dulo ng daigdig. Sa kanila ay naglagay siya ng tolda para sa araw,

⁵ na dumarating na gaya ng kasintahang lalaki na papalabas sa kanyang silid at nagagalak gaya ng malakas na tao na tumatakbo sa takbuhan.

⁶ Ang kanyang pagsikat ay mula sa dulo ng mga langit, at sa mga dulo niyon ay ang kanyang pagligid, at walang bagay na nakukubli sa kanyang init.

⁷ Ang kautusan ng PANGINOON ay sakdal, na nagpapanauli ng kaluluwa; ang patotoo ng PANGINOON ay tiyak, na nagpapatalino sa kulang sa kaalaman.

⁸ Ang mga tuntunin ng PANGINOON ay matuwid, na nagpapagalak sa puso; ang utos ng PANGINOON ay dalisay, na nagpapaliwanag ng mga mata.

⁹ Ang pagkatakot sa PANGINOON ay malinis, na nananatili magpakailanman: ang mga kahatulan ng PANGINOON ay totoo at lubos na makatuwiran.

¹⁰ Higit na dapat silang naisin kaysa ginto, lalong higit kaysa maraming dalisay na ginto; higit ding matamis kaysa pulot at sa pulot-pukyutang tumutulo.

¹¹ Bukod dito'y binalaan ang iyong lingkod sa pamamagitan nila, sa pagsunod sa mga iyon ay may dakilang gantimpala.

¹² Sinong makakaalam ng kanyang mga kamalian? Patawarin mo ako sa mga pagkakamaling di nalalaman.

¹³ Ilayo mo rin ang iyong lingkod sa mga mapangahas na pagkakasala. Huwag mong hayaang ang mga iyon ay magkaroon ng kapangyarihan sa akin! Kung gayo'y magiging matuwid ako, at magiging walang sala sa malaking paglabag.

¹⁴ Nawa'y ang mga salita ng bibig ko, at ang pagbubulay-bulay ng aking puso ay maging katanggap-tanggap sa paningin mo, O PANGINOON, ang aking malaking bato at manunubos ko.