Read Ang Bagong Ang Biblia Psalms 22 Bible Online

Psalms 22 - Ang Bagong Ang Biblia bible

Psalms 22

¹ Diyos ko, Diyos ko, bakit mo ako pinabayaan? Bakit napakalayo mo sa pagtulong sa akin, sa mga salita ng aking karaingan?

² O Diyos ko, sumisigaw ako kapag araw, ngunit hindi ka sumasagot man lamang, at kapag gabi, hindi ako makatagpo ng kapahingahan.

³ Gayunman ikaw ay banal, nakaluklok sa mga papuri ng Israel.

⁴ Sa iyo ang aming mga magulang ay nagtiwala, sila'y nagtiwala, at iyong iniligtas sila.

⁵ Sa iyo sila'y dumaing at naligtas; sila'y nagtiwala sa iyo, at hindi nabigo.

⁶ Ngunit ako'y uod at hindi tao, kinukutya ng mga tao, at hinahamak ng bayan.

⁷ Silang lahat na nakakita sa akin ay tinatawanan ako; nginungusuan nila ako, iiling-iling ang kanilang mga ulo,

⁸ "Ipinagkatiwala niya ang kanyang usapin sa PANGINOON; hayaang kanyang iligtas siya, hayaang kanyang sagipin siya, sapagkat kanyang kinaluluguran siya!"

⁹ Ngunit ikaw ang kumuha sa akin mula sa bahay-bata; iningatan mo ako nang ako'y nasa dibdib ng aking ina.

¹⁰ Sa iyo ako'y inilagak mula sa aking pagluwal, at mula nang ako'y ipagbuntis ng aking ina ang Diyos ko'y ikaw.

¹¹ Sa akin ay huwag kang lumayo, sapagkat malapit ang gulo, at walang sinumang sasaklolo.

¹² Pinaliligiran ako ng maraming toro, ng malalakas na toro ng Basan ay pinalilibutan ako.

¹³ Sa akin ang kanilang bibig ay binuksan nila nang maluwang, gaya ng sumasakmal at leong umuungal.

¹⁴ Ako'y ibinubuhos na parang tubig, at lahat ng aking mga buto ay nakakalas sa pagkakabit; ang aking puso ay parang pagkit, ito ay natutunaw sa loob ng aking dibdib.

¹⁵ Ang aking kalakasan ay natuyo na parang basag na banga, at ang aking dila ay dumidikit sa aking ngala-ngala; sa alabok ng kamatayan ako'y iyong inihihiga.

¹⁶ Oo, ang mga aso ay nakapaligid sa akin; pinaligiran ako ng isang pangkat ng mga gumagawa ng masama; binutasan nila ang aking mga kamay at mga paa.

¹⁷ Lahat ng aking mga buto ay aking mabibilang, sa akin sila'y nakatingin at ako'y tinititigan.

¹⁸ Kanilang pinaghatian ang aking mga kasuotan, at para sa aking damit sila ay nagsapalaran.

¹⁹ Ngunit ikaw, O PANGINOON, huwag kang lumayo! O ikaw na aking saklolo, magmadali kang tulungan ako!

²⁰ Mula sa tabak, kaluluwa ko'y iligtas mo, ang aking buhay mula sa kapangyarihan ng aso!

²¹ Mula sa bibig ng leon ako'y iyong iligtas, sagutin mo ako mula sa mga sungay ng torong mailap!

²² Sa aking mga kapatid ay ipahahayag ko ang iyong pangalan, pupurihin kita sa gitna ng kapulungan:

²³ Kayong natatakot sa PANGINOON, magpuri kayo sa kanya! Kayong lahat na binhi ni Jacob, luwalhatiin ninyo siya, at magsitayong may paggalang sa kanya, kayong lahat na mga anak ni Israel.

²⁴ Sapagkat hindi niya hinamak o kinapootan man ang kadalamhatian ng nagdadalamhati; at hindi niya ikinubli ang kanyang mukha sa kanya; kundi pinakinggan nang siya'y dumaing sa kanya.

²⁵ Sa iyo nanggagaling ang aking papuri sa dakilang kapulungan; tutuparin ko ang aking mga panata sa harapan ng mga sa kanya'y gumagalang.

²⁶ Ang dukha ay kakain at masisiyahan, yaong mga humanap sa kanya ay magpupuri sa PANGINOON! Mabuhay nawa ang inyong mga puso magpakailanman.

²⁷ Maaalala ng lahat ng mga dulong lupa, at sa PANGINOON ay manunumbalik sila; at lahat ng mga sambahayan ng mga bansa ay sa harapan mo magsisamba.

²⁸ Sapagkat sa PANGINOON ang kaharian, at siya ang namumuno sa mga bansa.

²⁹ Oo, sa kanya ang lahat ng masasagana sa lupa ay kakain at sasamba; sa harapan niya ay yumuyukod ang lahat ng bumabalik sa alabok, at siya na hindi mapapanatiling buhay ang kanyang kaluluwa,

³⁰ Ang susunod na salinlahi sa kanya ay magsisilbi, ang Panginoon ay ibabalita ng mga tao sa darating na salinlahi.

³¹ Sila'y darating at maghahayag ng kanyang katuwiran sa isang bayang isisilang, na dito ay siya ang may kagagawan.