Read Ang Bagong Ang Biblia Psalms 25 Bible Online

Psalms 25 - Ang Bagong Ang Biblia bible

Psalms 25

¹ Sa iyo, PANGINOON, itinataas ko ang aking kaluluwa.

² O Diyos ko, sa iyo ako nagtitiwala, huwag nawa akong mapahiya; ang aking mga kaaway, sa akin ay huwag nawang magkatuwa.

³ Oo, huwag nawang mapahiya ang lahat ng sa iyo'y naghihintay, mapahiya nawa ang mga gumagawa ng kataksilan nang walang dahilan.

⁴ Ipaalam mo sa akin ang iyong mga daan, O PANGINOON; ituro mo sa akin ang iyong mga landas.

⁵ Akayin mo ako sa iyong katotohanan, ako'y iyong turuan, sapagkat ikaw ang Diyos ng aking kaligtasan; sa iyo'y naghihintay ako nang buong araw.

⁶ Alalahanin mo, O PANGINOON, ang iyong kahabagan, at ang iyong tapat na pag-ibig, sapagkat ang mga iyon ay mula pa nang unang kapanahunan.

⁷ Huwag mong alalahanin ang mga kasalanan ng aking kabataan, ni ang aking mga pagsuway; ayon sa iyong wagas na pag-ibig ay alalahanin mo ako, O PANGINOON, alang-alang sa iyong kabutihan!

⁸ Ang PANGINOON ay mabuti at makatarungan, kaya't tinuturuan niya ang mga makasalanan tungkol sa daan.

⁹ Pinapatnubayan niya ang mapagpakumbaba tungkol sa katuwiran, at itinuturo sa mapagpakumbaba ang kanyang daan.

¹⁰ Lahat ng landas ng PANGINOON ay wagas na pag-ibig at katapatan, para sa mga nag-iingat ng kanyang mga patotoo at kanyang tipan.

¹¹ Alang-alang sa iyong pangalan, O PANGINOON, ipagpatawad mo ang aking kasalanan, sapagkat ito ay malaking tunay.

¹² Sino ang taong natatakot sa PANGlNOON? Siya ang tuturuan niya sa daan na dapat niyang piliin.

¹³ Siya mismo ay mananahan sa kasaganaan, at aangkinin ng kanyang mga anak ang lupain.

¹⁴ Ang pakikipagkaibigan ng PANGINOON ay para sa mga natatakot sa kanya, at ang kanyang tipan ay ipinaaalam niya sa kanila.

¹⁵ Palaging nasa PANGINOON ang aking mga mata, sapagkat mula sa lambat ay hihilahin niya ang aking mga paa.

¹⁶ Manumbalik ka sa akin, at ako'y kahabagan, sapagkat ako'y nalulungkot at nahihirapan.

¹⁷ Kabagabagan ng aking puso ay iyong pawiin, at sa aking kapanglawan ako ay hanguin.

¹⁸ Isaalang-alang mo ang aking kapighatian at kaguluhan, at patawarin mo ang lahat kong mga kasalanan.

¹⁹ Isaalang-alang mo kung gaano karami ang aking mga kaaway, at kung anong marahas na poot, ako'y kanilang kinamumuhian.

²⁰ O bantayan mo ang aking buhay, at iligtas mo ako; huwag nawa akong ipahiya, sapagkat nanganganlong ako sa iyo.

²¹ Nawa'y maingatan ako ng katapatan at katuwiran, sapagkat sa iyo ako'y naghihintay.

²² Tubusin mo ang Israel, O Diyos, mula sa lahat ng kanyang kabalisahan.