Read Ang Bagong Ang Biblia Psalms 32 Bible Online

Psalms 32 - Ang Bagong Ang Biblia bible

Psalms 32

¹ Mapalad siya na pinatawad ang pagsuway, na ang kasalanan ay tinakpan.

² Mapalad ang tao na hindi pinaparatangan ng kasamaan ng PANGINOON, at sa kanyang espiritu ay walang pandaraya.

³ Nang hindi ko ipinahayag ang aking kasalanan, nanghina ang aking katawan sa pamamagitan ng aking pagdaing sa buong araw.

⁴ Sa araw at gabi ay mabigat sa akin ang iyong kamay, ang aking lakas ay natuyong gaya ng sa init ng tag-araw. (Selah)

⁵ Kinilala ko ang aking kasalanan sa iyo, at hindi ko ikinubli ang aking kasamaan; aking sinabi, "Ipahahayag ko ang aking paglabag sa PANGINOON;" at iyong ipinatawad ang bigat ng aking kasalanan. (Selah)

⁶ Kaya't ang bawat isang banal ay manalangin sa iyo; sa panahong matatagpuan ka, tunay na sa pagragasa ng malaking tubig, siya'y hindi nila aabutan.

⁷ Ikaw ay aking dakong kublihan; iniingatan mo ako sa kaguluhan; pinalibutan mo ako ng mga awit ng kaligtasan. (Selah)

⁸ Aking ipapaalam at ituturo sa iyo ang daan na dapat mong lakaran. Papayuhan kita na ang aking mga mata ay nakatitig sa iyo.

⁹ Huwag kayong maging gaya ng kabayo o ng mola na walang unawa, na ang gayak ay may busal at pamingkaw upang sila'y pigilin na kung wala ito, sila'y hindi lalapit sa iyo.

¹⁰ Marami ang paghihirap ng masasama; ngunit tapat na pag-ibig ay nakapalibot sa kanya na sa PANGINOON ay nagtitiwala.

¹¹ Magsaya kayo sa PANGINOON, at magalak kayong matutuwid, at sumigaw sa kagalakan, kayong lahat na matutuwid sa puso!