Read Ang Bagong Ang Biblia Psalms 33 Bible Online

Psalms 33 - Ang Bagong Ang Biblia bible

Psalms 33

¹ Magalak kayo sa PANGINOON, O kayong matutuwid. Ang pagpupuri ay nababagay sa matuwid.

² Purihin ninyo ang PANGINOON sa pamamagitan ng lira, gumawa kayo ng himig sa kanya sa may sampung kuwerdas na alpa!

³ Awitan ninyo siya ng bagong awit; tumugtog na may kahusayan sa mga kuwerdas, na may sigaw na malalakas.

⁴ Sapagkat ang salita ng PANGINOON ay makatuwiran, at lahat niyang mga gawa ay ginawa sa katapatan.

⁵ Ang katuwiran at katarungan ay kanyang iniibig, puno ng tapat na pag-ibig ng PANGINOON ang daigdig.

⁶ Sa pamamagitan ng salita ng PANGINOON ay ginawa ang mga langit; at lahat ng mga hukbo nila sa pamamagitan ng hinga ng kanyang bibig.

⁷ Kanyang tinipon ang mga tubig ng dagat na gaya sa isang bunton; inilagay niya ang mga kalaliman sa mga imbakan.

⁸ Matakot nawa sa PANGINOON ang sandaigdigan, magsitayo nawang may paggalang sa kanya ang lahat ng naninirahan sa sanlibutan!

⁹ Sapagkat siya'y nagsalita at iyon ay naganap, siya'y nag-utos, at iyon ay tumayong matatag.

¹⁰ Dinadala ng PANGINOON sa wala ang payo ng mga bansa; kanyang binibigo ang mga panukala ng mga bayan.

¹¹ Ang payo ng PANGINOON kailanman ay nananatili, ang mga iniisip ng kanyang puso sa lahat ng salinlahi.

¹² Mapalad ang bansa na ang Diyos ay ang PANGINOON; ang bayan na kanyang pinili bilang kanyang mana!

¹³ Mula sa langit ang PANGINOON ay nakatanaw, lahat ng anak ng mga tao ay kanyang minamasdan.

¹⁴ Mula sa kanyang dakong tahanan ay nakatingin siya sa lahat ng naninirahan sa lupa,

¹⁵ siya na sa mga puso nilang lahat ay humuhugis, at sa lahat nilang mga gawa ay nagmamasid.

¹⁶ Ang isang hari ay hindi inililigtas ng kanyang napakaraming kawal; ang isang mandirigma ay hindi inililigtas ng kanyang makapangyarihang lakas.

¹⁷ Ang kabayong pandigma ay walang kabuluhang pag-asa para sa tagumpay, at hindi ito makapagliligtas sa pamamagitan ng kanyang makapangyarihang lakas.

¹⁸ Tunay na ang mata ng PANGINOON ay nasa kanila na natatakot sa kanya, sa kanila na umaasa sa tapat na pag-ibig niya,

¹⁹ upang kanyang mailigtas ang kaluluwa nila mula sa kamatayan, at sa taggutom ay panatilihin silang buhay.

²⁰ Naghihintay sa PANGINOON ang aming kaluluwa; siya ang aming saklolo at panangga.

²¹ Oo, ang aming puso ay nagagalak sa kanya, sapagkat kami ay nagtitiwala sa banal na pangalan niya.

²² Sumaamin nawa ang iyong tapat na pag-ibig, O PANGINOON, kung paanong kami ay umaasa sa iyo.