Read Ang Bagong Ang Biblia Psalms 34 Bible Online

Psalms 34 - Ang Bagong Ang Biblia bible

Psalms 34

¹ Pupurihin ko ang PANGINOON sa lahat ng panahon; ang pagpuri sa kanya ay sasaaking bibig nang patuloy.

² Nagmamapuri sa PANGINOON ang aking kaluluwa, marinig nawa ng mapagpakumbaba at magsaya.

³ O kasama kong dakilain ninyo ang PANGINOON, at magkasama nating itaas ang kanyang pangalan!

⁴ Hinanap ko ang PANGINOON, at ako'y kanyang sinagot, at iniligtas niya ako sa lahat ng aking mga takot.

⁵ Sila'y tumingin sa kanya, at naging makinang, at ang kanilang mga mukha ay hindi mapapahiya kailanman.

⁶ Ang abang taong ito ay dumaing, at ang PANGINOON sa kanya'y nakinig, at iniligtas siya sa lahat niyang mga ligalig.

⁷ Ang anghel ng PANGINOON ay nagbabantay sa palibot ng mga natatakot sa kanya, at inililigtas sila.

⁸ O inyong subukan at tingnan na mabuti ang PANGINOON! Maligaya ang tao na sa kanya'y nanganganlong.

⁹ O matakot kayo sa PANGINOON, kayong kanyang mga banal, sapagkat ang mga natatakot sa kanya ay hindi magkukulang!

¹⁰ Ang mga batang leon ay nagkukulang at nagugutom; ngunit silang humahanap sa PANGINOON sa mabuting bagay ay hindi nagsasalat.

¹¹ Halikayo, mga anak, pakinggan ninyo ako, ang takot sa PANGINOON ay ituturo ko sa inyo.

¹² Sinong tao ang nagnanasa ng buhay, at naghahangad ng maraming araw, upang magtamasa ng mabuti?

¹³ Ingatan mo ang iyong dila mula sa masama, at ang iyong mga labi sa pagsasalita ng pandaraya.

¹⁴ Lumayo ka sa kasamaan, at ang mabuti'y iyong gawin; hanapin mo ang kapayapaan at ito'y iyong habulin.

¹⁵ Ang mga mata ng PANGINOON ay sa matuwid nakatitig, at sa kanilang daing, bukas ang kanyang pandinig.

¹⁶ Ang mukha ng PANGINOON ay laban sa mga gumagawa ng masama, upang tanggalin ang alaala nila sa lupa.

¹⁷ Kapag ang matuwid ay humingi ng saklolo, ang PANGINOON ay nakikinig, at inililigtas sila sa lahat nilang mga gulo.

¹⁸ Ang PANGINOON ay malapit sa may pusong wasak, at inililigtas ang mga may bagbag na diwa.

¹⁹ Marami ang kapighatian ng matuwid; ngunit inililigtas siya ng PANGINOON sa lahat ng mga iyon.

²⁰ Lahat nitong mga buto ay iniingatan niya, sa mga iyon ay hindi nababali ni isa.

²¹ Ang masama ay papatayin ng kasamaan, at ang mga napopoot sa matuwid ay hahatulan.

²² Tinutubos ng PANGINOON ang buhay ng mga lingkod niya; walang hahatulan sa sinumang nanganganlong sa kanya.