Read Ang Bagong Ang Biblia Psalms 35 Bible Online

Psalms 35 - Ang Bagong Ang Biblia bible

Psalms 35

¹ Makipagtunggali ka, O PANGINOON, sa kanila na nakikipagtunggali sa akin; lumaban ka sa kanila na lumalaban sa akin.

² Humawak ka ng kalasag at ng panangga, at sa pagtulong sa akin ay tumindig ka!

³ Ihagis mo ang sibat at diyabelin laban sa mga nagsisihabol sa akin! Sabihin mo sa aking kaluluwa, "Ako'y iyong kaligtasan!"

⁴ Mapahiya nawa at mawalan ng dangal sila na umuusig sa aking buhay! Nawa'y mapaurong at malito sila na laban sa akin ay nagbabalak na masama!

⁵ Maging gaya nawa sila ng ipa sa harapan ng hangin, na ang anghel ng PANGINOON ang nagtataboy sa kanila!

⁶ Nawa'y maging madilim at madulas ang daan nila, na ang anghel ng PANGINOON ang humahabol sa kanila!

⁷ Sapagkat walang kadahilanang ikinubli nila ang kanilang bitag na sa akin ay laan, walang kadahilanang naghukay sila para sa aking buhay.

⁸ Dumating nawa sa kanila nang di namamalayan ang kapahamakan! At ang patibong na ikinubli nila ang sa kanila'y bumitag; mahulog nawa sila doon upang mapahamak!

⁹ Kung gayo'y sa PANGINOON magagalak ang aking kaluluwa, na sa kanyang pagliligtas ay nagpapasaya.

¹⁰ Lahat ng aking mga buto ay magsasabi, "PANGINOON, sino ang iyong kagaya? Ikaw na nagliligtas ng mahina mula sa kanya na totoong malakas kaysa kanya, ang mahina at nangangailangan mula sa nanamsam sa kanya?

¹¹ Mga saksing may masamang hangarin ay nagtatayuan; tinatanong nila ako ng mga bagay na di ko nalalaman.

¹² Sa aking kabutihan, iginanti ay kasamaan, ang aking kaluluwa ay namamanglaw.

¹³ Ngunit ako, nang sila'y may sakit, ay nagsuot ako ng damit-sako; dinalamhati ko ang aking sarili ng pag-aayuno. Sa dibdib ko'y nanalanging nakayuko ang ulo,

¹⁴ ako'y lumakad na tila baga iyon ay aking kaibigan o kapatid, ako'y humayong gaya ng tumatangis sa kanyang ina na nakayukong nagluluksa.

¹⁵ Ngunit sa aking pagkatisod, sila'y nagtipon na natutuwa, sila'y nagtipun-tipon laban sa akin, mga mambubugbog na hindi ko kilala ang walang hintong nanlait sa akin.

¹⁶ Gaya ng mga walang diyos na nanunuya sa pista, kanilang pinagngangalit sa akin ang mga ngipin nila.

¹⁷ Hanggang kailan ka titingin, O PANGINOON? Iligtas mo ang aking kaluluwa sa kanilang mga pagpinsala, ang aking buhay mula sa mga leon!

¹⁸ At ako'y magpapasalamat sa iyo sa dakilang kapulungan; sa gitna ng napakaraming tao kita'y papupurihan.

¹⁹ Huwag nawang magalak sa akin yaong sinungaling kong mga kaaway; at huwag nawang ikindat ang mata ng mga napopoot sa akin nang walang kadahilanan.

²⁰ Sapagkat sila'y hindi nagsasalita ng kapayapaan, kundi laban doon sa mga tahimik sa lupain ay kumakatha sila ng mga salita ng kabulaanan.

²¹ Kanilang ibinubuka nang maluwang ang bibig nila laban sa akin; kanilang sinasabi: "Aha, aha, nakita iyon ng mga mata namin!"

²² Iyong nakita ito, O PANGINOON; huwag kang tumahimik, O Panginoon, huwag kang lumayo sa akin!

²³ Kumilos ka, at gumising ka para sa aking karapatan, Diyos ko at Panginoon ko, para sa aking ipinaglalaban!

²⁴ Ipagtanggol mo ako, O PANGINOON, aking Diyos, ayon sa iyong katuwiran; at dahil sa akin huwag mo silang hayaang magkatuwaan!

²⁵ Huwag mo silang hayaang magsabi sa sarili nila, "Aha, iyan ang aming kagustuhan!" Huwag silang hayaang magsabi, "Aming nalulon nasiya."

²⁶ Mapahiya nawa sila at malitong magkakasama silang nagagalak sa aking kapahamakan! Madamitan nawa sila ng kahihiyan at kawalang-dangal silang laban sa akin ay nagyayabang!

²⁷ Silang nagnanais na ako'y mapawalang-sala ay sumigaw sa kagalakan at magsaya, at sa tuwina'y sabihin, "Dakila ang PANGINOON, na nalulugod sa kapakanan ng kanyang lingkod!"

²⁸ Kung gayo'y isasaysay ng aking dila ang iyong katuwiran at ang iyong kapurihan sa buong araw.