Read Ang Bagong Ang Biblia Psalms 37 Bible Online

Psalms 37 - Ang Bagong Ang Biblia bible

Psalms 37

¹ Huwag kang mabalisa dahil sa masasama, huwag kang managhili sa mga masama ang gawa!

² Sapagkat gaya ng damo sila'y dagling maglalaho, at gaya ng luntiang halaman, sila'y matutuyo.

³ Magtiwala ka sa PANGINOON, at gumawa ka ng kabutihan; upang ikaw ay makapanirahan sa lupain at magtamasa ng katiwasayan.

⁴ Sa PANGINOON ikaw ay magpakaligaya, at ang mga nasa ng iyong puso sa iyo'y ibibigay niya.

⁵ Ipagkatiwala mo ang iyong lakad sa PANGINOON; magtiwala ka sa kanya, at siya'y gagawa.

⁶ Ang iyong pagiging walang-sala ay pakikinangin niyang gaya ng liwanag, at ang iyong pagiging matuwid na gaya ng katanghaliang-tapat.

⁷ Ikaw ay manahimik sa PANGINOON, at matiyaga kang maghintay sa kanya: huwag kang mabalisa sa gumiginhawa sa lakad niya, dahil sa taong nagsasagawa ng masamang pakana.

⁸ Iwasan mo ang pagkagalit, at ang poot ay iyong talikdan! Huwag kang maghimutok, ito'y maghahatid lamang sa kasamaan.

⁹ Sapagkat ang masasama ay tatanggalin; ngunit ang naghihintay sa PANGINOON ay magmamana ng lupain.

¹⁰ Gayunma'y sandali na lamang, at ang masama ay mawawala na; kahit tingnan mong mabuti ang kanyang lugar, siya ay wala roon.

¹¹ Ngunit mamanahin ng maaamo ang lupain, at masisiyahan ang kanilang sarili sa lubos na kasaganaan.

¹² Ang masama ay nagpapakana laban sa matuwid, at ang mga ngipin nito sa kanya'y pinagngangalit;

¹³ ngunit pinagtatawanan ng PANGINOON ang masama, sapagkat kanyang nakikita na dumarating ang araw niya.

¹⁴ Hinuhugot ng masama ang tabak at ang kanilang mga pana ay iniaakma, upang ang dukha at nangangailangan ay pabagsakin, upang ang mga lumalakad nang matuwid ay patayin;

¹⁵ ang kanilang tabak ay tatarak sa sariling puso nila, at mababali ang kanilang mga pana.

¹⁶ Mas mainam ang kaunti na mayroon ang matuwid na tao, kaysa kasaganaan ng maraming taong lilo.

¹⁷ Sapagkat ang mga bisig ng masasama ay mababali; ngunit inaalalayan ng PANGINOON ang matuwid.

¹⁸ Nalalaman ng PANGINOON ang mga araw ng mga walang kapintasan, at ang kanilang mana ay mananatili magpakailanman.

¹⁹ Hindi sila mapapahiya sa panahon ng kasamaan; sa mga araw ng taggutom ay mayroon silang kasaganaan.

²⁰ Ngunit ang masama ay mamamatay, ang mga kaaway ng PANGINOON ay gaya ng luwalhati ng mga pastulan, sila'y nawawala — gaya ng usok sila'y napaparam.

²¹ Ang masama ay humihiram, at hindi makapagbayad, ngunit ang matuwid ay bukas-palad at nagbibigay;

²² sapagkat ang mga pinagpala ng PANGINOON ay magmamana ng lupain; ngunit ang mga sinumpa niya ay tatanggalin.

²³ Ang mga lakad ng isang tao ay ang PANGINOON ang nagtatatag; at siya'y nasisiyahan sa kanyang lakad;

²⁴ bagaman siya'y mahulog, hindi siya lubos na mabubuwal, sapagkat ang PANGINOON ang aalalay sa kanyang kamay.

²⁵ Ako'y naging bata, at ngayo'y matanda na; gayunma'y hindi ko nakita na ang matuwid ay pinabayaan, ni ang kanyang mga anak ay namamalimos ng tinapay.

²⁶ Siya ay laging mapagbigay at nagpapahiram; at ang kanyang mga anak ay nagiging pagpapala.

²⁷ Lumayo ka sa masama at gumawa ka ng mabuti; upang sa magpakailanman ikaw ay manatili.

²⁸ Sapagkat iniibig ng PANGINOON ang katarungan, hindi niya pababayaan ang kanyang mga banal. Sila'y iingatan magpakailanman, ngunit ang mga anak ng masama ay ititiwalag.

²⁹ Mamanahin ng matuwid ang lupain, at maninirahan doon magpakailanman.

³⁰ Ang bibig ng matuwid ay nangungusap ng karunungan, at ang kanyang dila ay nagsasalita ng katarungan.

³¹ Ang kautusan ng kanyang Diyos sa puso niya'y taglay, hindi nadudulas ang kanyang mga hakbang.

³² Inaabangan ng masama ang matuwid na tao, at pinagsisikapang patayin niya ito.

³³ Hindi siya iiwan ng PANGINOON sa kanyang kamay, ni hahayaan siyang maparusahan kapag siya'y nahatulan.

³⁴ Hintayin mo ang PANGINOON, at ingatan ang kanyang daan, at itataas ka niya upang manahin mo ang lupain; ang pagkawasak ng masama ay iyong pagmamasdan.

³⁵ Nakakita ako ng masama at marahas na tao, na lumalaganap na gaya ng sariwang punungkahoy sa kanyang lupang tinubuan.

³⁶ Muli akong dumaan at, narito, wala na siya; kahit hinanap ko siya, hindi na siya makita.

³⁷ Tandaan mo ang taong walang kapintasan, at ang matuwid ay iyong masdan, sapagkat may hinaharap para sa taong may kapayapaan.

³⁸ Ngunit ang mga sumusuway ay sama-samang pupuksain; ang susunod na lahi ng masama ay puputulin.

³⁹ Ang kaligtasan ng matuwid ay mula sa PANGINOON; siya ang kanilang kanlungan sa magulong panahon.

⁴⁰ At sila'y tinutulungan at pinalalaya ng PANGINOON; kanyang pinalalaya sila mula sa masama, at inililigtas sila, sapagkat sila'y nanganganlong sa kanya.