Read Ang Bagong Ang Biblia Psalms 38 Bible Online

Psalms 38 - Ang Bagong Ang Biblia bible

Psalms 38

¹ O PANGINOON, sa pagkagalit mo ay huwag mo akong sawayin, ni sa iyong pagkapoot ay huwag mo akong supilin!

² Sapagkat ang iyong mga palaso sa akin ay tumimo, at pumisil sa akin ang kamay mo.

³ Walang kaginhawahan sa aking laman dahil sa iyong kapootan; walang kalusugan sa aking mga buto dahil sa aking kasalanan.

⁴ Sapagkat ang mga kasamaan ko ay nakarating sa ibabaw ng aking ulo, ang mga iyon ay gaya ng isang pasan na napakabigat para sa akin.

⁵ Ang aking mga sugat ay mabaho at nagnanana, dahil sa aking kahangalan.

⁶ Ako'y yukong-yuko at nakabulagta, ako'y tumatangis buong araw.

⁷ Sapagkat nag-iinit ang aking mga balakang, at walang kaginhawahan sa aking laman.

⁸ Nanghihina at bugbog ako; ako'y dumaing dahil sa bagabag ng aking puso.

⁹ Panginoon, lahat ng aking inaasam ay batid mo; ang aking hinagpis ay hindi lingid sa iyo.

¹⁰ Ang aking puso ay kakaba-kaba, ang aking lakas ay kinakapos, at ang liwanag ng aking paningin, sa akin ay nawala din.

¹¹ Ang aking mga kaibigan at mga kasamahan ay walang malasakit sa aking kapighatian, at nakatayong napakalayo ang aking kamag-anakan.

¹² Yaong mga nagtatangka sa aking buhay ay naglagay ng kanilang mga bitag, silang nagsisihanap ng aking ikapapahamak ay nagsasalita ng pagkawasak, at nag-iisip ng kataksilan sa buong araw.

¹³ Ngunit ako'y gaya ng taong bingi, hindi ako nakakarinig; gaya ng taong pipi na hindi nagbubuka ng kanyang bibig.

¹⁴ Oo, ako'y gaya ng tao na hindi nakakarinig, at walang pangangatuwiran sa aking bibig.

¹⁵ Ngunit sa iyo ako naghihintay, O PANGINOON, ikaw, O PANGINOON kong Diyos ang siyang tutugon.

¹⁶ Sapagkat aking sinabi, "Huwag mo lamang hayaang sila'y magalak laban sa akin, na laban sa akin ay nagmamataas kapag ang paa ko ay nadudulas!"

¹⁷ Sapagkat ako'y malapit nang matumba, at ang aking kirot ay nasa akin tuwina.

¹⁸ Ipinahahayag ko ang aking kasamaan; ako'y puno ng kabalisahan dahil sa aking kasalanan.

¹⁹ Yaong aking mga kaaway na walang kadahilanan ay makapangyarihan, at marami silang napopoot sa akin na wala sa katuwiran.

²⁰ Silang gumaganti ng kasamaan sa aking kabutihan, ay aking mga kaaway sapagkat sinusunod ko ang kabutihan.

²¹ O PANGINOON, huwag mo akong pabayaan; O Diyos ko, huwag mo akong layuan!

²² Magmadali kang ako'y tulungan, O Panginoori, aking kaligtasan!