Read Ang Bagong Ang Biblia Psalms 52 Bible Online

Psalms 52 - Ang Bagong Ang Biblia bible

Psalms 52

¹ Bakit ka naghahambog, O makapangyarihang tao? Ang kagandahang-loob ng Diyos ay sa buong araw. Sa buong araw ang dila mo'y nagbabalak ng pagkawasak.

² Ang dila mo'y gaya ng matalas na labaha, ikaw na gumagawa ng kataksilan.

³ Iniibig mo ang kasamaan ng higit kaysa kabutihan; at ang pagsisinungaling kaysa pagsasalita ng katotohanan. (Selah)

⁴ Iniibig mo ang lahat ng mga nananakmal na salita, O ikaw na mandarayang dila.

⁵ Ngunit ilulugmok ka ng Diyos magpakailanman, aagawin at hahatakin ka niya mula sa iyong tolda, at bubunutin ka niya sa lupain ng mga buhay. (Selah)

⁶ Makikita ng matuwid, at matatakot, at pagtatawanan siya, na nagsasabi,

⁷ "Pagmasdan ninyo ang tao na hindi niya ginawang kanlungan ang Diyos; kundi nagtiwala sa kasaganaan ng kanyang mga kayamanan, at nagpakalakas sa kanyang nasa."

⁸ Ngunit ako'y gaya ng sariwang punungkahoy ng olibo sa bahay ng Diyos. Nagtitiwala ako sa tapat na pag-ibig ng Diyos magpakailanpaman.

⁹ Ako'y magpapasalamat sa iyo magpakailanman, sapagkat iyon ay iyong ginawa. At ako'y maghihintay sa iyong pangalan sapagkat ito'y mabuti, sa harapan ng mga banal.