Read Ang Bagong Ang Biblia Psalms 53 Bible Online

Psalms 53 - Ang Bagong Ang Biblia bible

Psalms 53

¹ "Walang Diyos," sinasabi ng pusong hangal. Sila'y masasama at gumagawa ng kasamaang karumaldumal, wala isa mang gumagawa ng mabuti.

² Ang Diyos ay tumutunghay mula sa langit sa mga anak ng mga tao, upang tingnan kung may sinumang matalino, na naghahanap sa Diyos.

³ Silang lahat ay tumalikod; sila'y pawang masasama, walang sinumang gumagawa ng mabuti, wala, wala kahit isa.

⁴ Wala bang kaalaman ang mga gumagawa ng kasamaan? Sila na kumakain ng aking bayan na tila sila'y kumakain ng tinapay, at hindi tumatawag sa Diyos?

⁵ Doon sila'y nasa matinding takot, na kung saan ay walang dapat ikatakot. Sapagkat ikinalat ng Diyos ang mga buto nilang kumukubkob laban sa iyo, sila'y inilagay mo sa kahihiyan, sapagkat itinakuwil sila ng Diyos.

⁶ O, nawa'y ang pagliligtas para sa Israel ay dumating mula sa Zion! Kapag ibinalik ng Diyos ang kapalaran ng kanyang bayan, magagalak ang Jacob at matutuwa ang Israel.