Read Ang Bagong Ang Biblia Psalms 57 Bible Online

Psalms 57 - Ang Bagong Ang Biblia bible

Psalms 57

¹ Maawa ka sa akin, O Diyos, sa akin ay maawa ka, sapagkat nanganganlong sa iyo ang aking kaluluwa, sa lilim ng iyong mga pakpak ay manganganlong ako, hanggang sa makaraan ang mga pagkawasak na ito.

² Sa Diyos na Kataas-taasan ako'y dumaraing, sa Diyos na nagsasagawa ng lahat na mga bagay sa akin.

³ Siya'y magsusugo mula sa langit at ako'y ililigtas ilalagay niya sa kahihiyan ang sa akin ay yumuyurak, (Selah) Susuguin ng Diyos ang kanyang pag-ibig na tapat at ang kanyang katapatan!

⁴ Ang aking kaluluwa ay nasa gitna ng mga leon, ako'y nahihiga sa gitna ng mga taong bumubuga ng apoy, sa mga anak ng tao na ang mga ngipin ay sibat at mga pana, at matalas na mga tabak ang kanilang dila.

⁵ Mabunyi ka, O Diyos, sa itaas ng mga langit, ikaw naging dakila! Ang iyong kaluwalhatian nawa'y mapasa buong lupa!

⁶ Naglagay sila ng silo para sa aking mga hakbang; ang aking kaluluwa ay nakayuko. Sila'y gumawa ng isang hukay sa aking daan, ngunit sila mismo ang doon ay nabuwal. (Selah)

⁷ Ang aking puso ay tapat, O Diyos, ang aking puso ay tapat! Ako'y aawit, Oo, ako'y aawit ng mga papuri!

⁸ Gumising ka, aking kaluwalhatian! Gumising ka, O lira at alpa! Gigisingin ko ang bukang-liwayway!

⁹ Ako'y magpapasalamat sa iyo, O Panginoon, sa gitna ng mga bayan. Ako'y aawit sa iyo ng mga papuri sa gitna ng mga bansa.

¹⁰ Sapagkat ang iyong tapat na pag-ibig ay dakila hanggang sa mga langit, ang iyong katapatan hanggang sa mga ulap.

¹¹ O Diyos, sa itaas ng kalangitan, ikaw ay maging dakila! Ang iyong kaluwalhatian nawa'y mapasa buong lupa!