Read Ang Bagong Ang Biblia Psalms 59 Bible Online

Psalms 59 - Ang Bagong Ang Biblia bible

Psalms 59

¹ Iligtas mo ako sa aking mga kaaway, O Diyos ko, mula sa mga nag-aalsa laban sa akin, sa itaas ay ilagay mo ako.

² Iligtas mo ako sa mga gumagawa ng kasamaan, at iligtas mo ako sa mga taong sa dugo ay uhaw.

³ Narito, sapagkat pinagtatangkaan ang aking buhay; ang mga taong mababagsik laban sa akin ay nagsasama-sama. Hindi dahil sa aking pagsuway o sa aking kasalanan man, O PANGINOON,

⁴ sila'y tumatakbo at naghahanda sa di ko kasalanan. Ikaw ay bumangon, tulungan mo ako, at iyong masdan!

⁵ Ikaw, O PANGINOONG Diyos ng mga hukbo, na Diyos ng Israel. Gumising ka upang iyong parusahan ang lahat ng mga bansa; huwag mong patatawarin ang sinumang may kataksilang nagpakana ng masama. (Selah)

⁶ Tuwing hapon ay bumabalik sila, tumatahol na parang aso, at nagpapagala-gala sa lunsod.

⁷ Narito, sila'y nanunungayaw sa pamamagitan ng kanilang bibig; mga tabak ay nasa kanilang mga labi — sapagkat sinasabi nila, "Sinong makikinig sa amin?"

⁸ Ngunit ikaw, O PANGINOON, ay pinagtatawanan mo sila, iyong tinutuya ang lahat ng mga bansa.

⁹ Dahil sa kanyang kalakasan, babantayan kita, sapagkat ikaw, O Diyos ay muog ko.

¹⁰ Ang aking Diyos sa kanyang tapat na pag-ibig ay sasalubong sa akin; ipinahihintulot ng aking Diyos na ako'y tumingin na may pagtatagumpay sa aking mga kaaway.

¹¹ Huwag mo silang patayin, baka makalimot ang aking bayan; pangalatin mo sila sa pamamagitan ng iyong kapangyarihan, at ibaba mo sila, O Panginoon na kalasag namin!

¹² Dahil sa kasalanan ng kanilang bibig, at sa mga salita ng kanilang mga labi, masilo nawa sila sa kanilang kapalaluan, dahil sa sumpa at sinalita nilang kasinungalingan.

¹³ Pugnawin mo sila sa poot, pugnawin mo sila hanggang sa sila'y wala na, upang malaman ng tao na ang Diyos ang namumuno sa Jacob, hanggang sa mga wakas ng lupa. (Selah)

¹⁴ Bawat hapon ay bumabalik sila, na tumatahol na parang aso at pagala-gala sa lunsod.

¹⁵ Sila'y gumagala upang may makain, at tumatahol kapag hindi sila nabusog.

¹⁶ Ngunit aking aawitin ang iyong kalakasan; Oo, aking aawiting malakas sa umaga ang iyong tapat na pag-ibig, sapagkat ikaw ay naging aking muog, at kanlungan sa araw ng aking kapighatian.

¹⁷ O aking kalakasan, aawit ako ng mga papuri sa iyo, sapagkat ikaw, O Diyos, ay muog ko, ang Diyos na nagpapakita sa akin ng tapat na pagsuyo.