Read Ang Bagong Ang Biblia Psalms 6 Bible Online

Psalms 6 - Ang Bagong Ang Biblia bible

Psalms 6

¹ O PANGINOON, huwag mo akong sawayin sa iyong kagalitan, ni sa iyong pagkapoot, ako ay parusahan man.

² Maawa ka sa akin, O PANGINOON; sapagkat ako'y nanghihina; O PANGINOON, pagalingin mo ako; sapagkat nanginginig ang aking mga buto.

³ Ang aking kaluluwa ay nababagabag ding mainam. Ngunit ikaw, O PANGINOON, hanggang kailan?

⁴ Bumalik ka, O PANGINOON, iligtas mo ang aking buhay; iligtas mo ako alang-alang sa iyong tapat na pagmamahal.

⁵ Sapagkat sa kamatayan ay hindi ka naaalala; sa Sheol naman ay sinong sa iyo ay magpupuri pa?

⁶ Sa aking pagdaing ako ay napapagod na, bawat gabi ay pinalalangoy ko ang aking higaan, dinidilig ko ang aking higaan ng aking mga pagluha.

⁷ Ang aking mga mata dahil sa dalamhati ay namumugto, ito'y tumatanda dahil sa lahat ng mga kaaway ko.

⁸ Lumayo kayo sa akin, kayong lahat na gumagawa ng kasamaan, sapagkat ang tinig ng aking pagtangis ay kanyang pinakinggan.

⁹ Narinig ng PANGINOON ang aking pagdaing; tinatanggap ng PANGINOON ang aking panalangin.

¹⁰ Lahat ng kaaway ko'y mapapahiya at mababagabag na mainam; sila'y babalik, at kaagad na mapapahiya.