Read Ang Bagong Ang Biblia Psalms 60 Bible Online

Psalms 60 - Ang Bagong Ang Biblia bible

Psalms 60

¹ O Diyos, kami ay iyong tinalikuran, winasak mo kami. Ikaw ay nagalit; O ibalik mo kami.

² Iyong niyanig ang lupain, iyong ibinuka; kumpunihin mo ang mga sira niyon, sapagkat ito'y umuuga.

³ Pinaranas mo ng mahihirap na mga bagay ang iyong bayan; binigyan mo kami ng alak na inumin na nagpasuray sa amin.

⁴ Naglagay ka ng watawat para sa mga natatakot sa iyo, upang ito'y mailantad dahil sa katotohanan. (Selah)

⁵ Upang ang iyong minamahal ay mailigtas, bigyan ng tagumpay sa pamamagitan ng iyong kanang kamay at sagutin mo kami.

⁶ Nagsalita ang Diyos sa kanyang santuwaryo, "Ako'y magsasaya, aking hahatiin ang Shekem, at aking susukatin ang libis ng Sucot.

⁷ Ang Gilead ay akin, ang Manases ay akin; ang Efraim din ay helmet ng ulo ko, ang Juda ay aking setro.

⁸ Ang Moab ay aking hugasan; sa Edom ay ihahagis ko ang aking sandalyas; Filistia, dahil sa akin, sumigaw ka ng malakas."

⁹ Sinong magdadala sa akin sa lunsod na may kuta? Sinong papatnubay sa akin hanggang sa Edom?

¹⁰ Hindi mo ba kami tinalikuran, O Diyos? At hindi ka ba hahayo, O Diyos, na kasama ng aming mga hukbo?

¹¹ O pagkalooban mo kami ng tulong laban sa kaaway, sapagkat walang kabuluhan ang tulong ng tao!

¹² Kasama ng Diyos ay gagawa kaming may katapangan; sapagkat siya ang tatapak sa aming mga kaaway.