Read Ang Bagong Ang Biblia Psalms 61 Bible Online

Psalms 61 - Ang Bagong Ang Biblia bible

Psalms 61

¹ Pakinggan mo, O Diyos, ang aking daing, dinggin mo ang aking dalangin.

² Mula sa dulo ng lupa ay tumatawag ako sa iyo, kapag nanlulupaypay ang aking puso. Ihatid mo ako sa bato na higit na mataas kaysa akin;

³ sapagkat ikaw ay aking kanlungan, isang matibay na muog laban sa kaaway.

⁴ Patirahin mo ako sa iyong tolda magpakailanman! Ako'y manganganlong sa lilim ng iyong mga pakpak! (Selah)

⁵ Sapagkat ang aking mga panata, O Diyos, ay iyong pinakinggan, ibinigay mo sa akin ang pamana ng mga may takot sa iyong pangalan.

⁶ Pahabain mo ang buhay ng hari; tumagal nawa ang kanyang mga taon hanggang sa lahat ng mga salinlahi!

⁷ Siya nawa'y maluklok sa trono sa harapan ng Diyos magpakailanman; italaga mong bantayan siya ng wagas na pag-ibig at katapatan!

⁸ Sa gayo'y ako'y aawit ng mga papuri sa iyong pangalan magpakailanman, habang tinutupad ko ang aking mga panata araw-araw.