Read Ang Bagong Ang Biblia Psalms 65 Bible Online

Psalms 65 - Ang Bagong Ang Biblia bible

Psalms 65

¹ Magkakaroon ng katahimikan sa harapan mo at papuri sa Zion, O Diyos; at sa iyo'y isasagawa ang mga panata,

² O ikaw na dumirinig ng panalangin! Sa iyo'y lalapit ang lahat ng laman.

³ Mga kasamaan ay nananaig laban sa akin, tungkol sa aming mga kasalanan, ito ay pinapatawad mo.

⁴ Mapalad ang tao na iyong pinipili at pinalalapit upang manirahan sa iyong mga bulwagan! Kami ay masisiyahan sa kabutihan ng iyong bahay, ng iyong templong banal!

⁵ Sa pamamagitan ng mga gawaing kakilakilabot, sa katuwiran kami'y iyong sinasagot, O Diyos ng aming kaligtasan; ikaw na siyang tiwala ng lahat ng mga hangganan ng lupa, at ng mga dagat na pinakamalayo.

⁶ Sa pamamagitan ng iyong lakas ay itinayo ang kabundukan, palibhasa'y nabibigkisan ng kapangyarihan.

⁷ Ikaw ang nagpapatigil ng ugong ng mga karagatan, ng ugong ng kanilang mga alon, at ng pagkakaingay ng mga bayan.

⁸ Anupa't sila na naninirahan sa pinakamalayong hangganan ng lupa ay natatakot sa iyong mga tanda; ang mga paglabas ng umaga at gabi ay pinasisigaw mo sa tuwa.

⁹ Ang lupa'y iyong dinadalaw at dinidiligan, iyong pinayayamang mainam; ang ilog ng Diyos ay puno ng tubig; ang kanilang butil ay inihahanda mo, sapagkat sa gayon inihanda mo ang lupa.

¹⁰ Dinidilig mo nang sagana ang mga tudling nito, iyong pinapantay ang kanyang mga pilapil, at pinalalambot ng ambon, at pinagpapala ang paglago nito.

¹¹ Pinuputungan mo ang taon ng iyong kasaganaan, ang mga bakas ng iyong karwahe ay tumutulo ng katabaan.

¹² Ang mga pastulan sa ilang ay umaapaw, ang mga burol ay nabibigkisan ng kagalakan,

¹³ ang mga pastulan ay nabibihisan ng mga kawan; ang mga libis ay natatakpan ng butil, sila'y sumisigaw sa kagalakan, Oo sila ay umaawit.