Read Ang Bagong Ang Biblia Psalms 71 Bible Online

Psalms 71 - Ang Bagong Ang Biblia bible

Psalms 71

¹ Sa iyo, O PANGINOON, nanganganlong ako; huwag nawa akong mapahiya kailanman!

² Iligtas at sagipin mo ako sa katuwiran mo, ikiling mo ang iyong pandinig sa akin, at iligtas mo ako!

³ Ikaw sa akin ay maging bato ng tahanan na lagi kong paroroonan; sapagkat ikaw ay aking muog at malaking bato.

⁴ Sa kamay ng masama, O aking Diyos, sagipin mo ako, mula sa sunggab ng di-matuwid at malupit na tao.

⁵ Sapagkat ikaw ang aking pag-asa, O Panginoong DIYOS, ikaw ay aking tiwala mula sa aking kabataan.

⁶ Sa iyo ako sumandal mula sa kapanganakan ko, ikaw ang kumuha sa akin mula sa tiyan ng aking ina. Ang pagpupuri ko'y magiging laging sa iyo.

⁷ Sa marami ako'y naging kagila-gilalas; ngunit ikaw ang matibay kong kanlungan.

⁸ Ang bibig ko'y puno ng pagpupuri sa iyo, at ng iyong kaluwalhatian buong araw.

⁹ Huwag mo akong itakuwil sa panahon ng katandaan; huwag mo akong pabayaan kapag nauubos na ang aking kalakasan.

¹⁰ Sapagkat nagsasalita laban sa akin ang aking mga kaaway, silang nagbabantay sa aking buhay ay nagsasanggunian,

¹¹ at nagsasabi, "Pinabayaan na siya ng Diyos: habulin at hulihin siya; sapagkat walang magliligtas sa kanya."

¹² O Diyos, huwag kang maging malayo sa akin; O Diyos ko, magmadali kang tulungan ako!

¹³ Ang mga kaaway ng aking kaluluwa nawa'y mapahiya at malipol; matabunan nawa ng paghamak at kahihiyan ang mga nagnanais na ako'y masaktan.

¹⁴ Ngunit ako'y laging aasa, at pupurihin kita nang higit at higit pa.

¹⁵ Ang bibig ko'y magsasabi ng iyong katuwiran, ng iyong mga kaligtasan buong araw; sapagkat ang kanilang bilang ay di abot ng aking kaalaman.

¹⁶ Ako'y darating na may mga makapangyarihang gawa ng Panginoong DIYOS, aking pupurihin ang iyong katuwiran, ang iyo lamang.

¹⁷ O Diyos, iyong tinuruan ako mula sa aking pagkabata; at ipinahahayag ko pa ang iyong kagila-gilalas na mga gawa.

¹⁸ Kaya't maging sa pagtanda at pagkakaroon ng mga uban, O Diyos, huwag mo akong pabayaan; hanggang sa aking maipahayag ang iyong kalakasan sa lahat ng darating na salinlahi. Ang iyong kapangyarihan sa bawat isa na darating,

¹⁹ at ang iyong katuwiran, O Diyos, ay umabot sa mataas na kalangitan. Ikaw na gumawa ng dakilang mga bagay, O Diyos, sino ang gaya mo?

²⁰ Ikaw na nagpakita sa akin ng maraming matitinding kabagabagan, ang sa akin ay muling bubuhay; mula sa mga kalaliman ng lupa, ay muli mo akong ibabangon.

²¹ Kadakilaan ko nama'y iyong paramihin, at muli akong aliwin.

²² Pupurihin din kita sa pamamagitan ng salterio, dahil sa iyong katapatan, O Diyos ko; sa iyo'y aawit ako ng mga papuri sa pamamagitan ng alpa, O Banal ng Israel.

²³ Sisigaw sa kagalakan ang mga labi ko, kapag ako'y umaawit ng mga papuri sa iyo; gayundin ang kaluluwa ko na iniligtas mo.

²⁴ At ang dila ko ay magsasalita ng iyong katuwiran sa buong maghapon, sapagkat sila'y napahiya at napahamak, sila na nagnanais na ako'y saktan.