Read Ang Bagong Ang Biblia Psalms 73 Bible Online

Psalms 73 - Ang Bagong Ang Biblia bible

Psalms 73

¹ Tunay na ang Diyos ay mabuti sa Israel, sa mga taong ang puso'y malilinis.

² Ngunit tungkol sa akin, ang mga paa ko'y halos natisod, ang mga hakbang ko'y muntik nang nadulas.

³ Sapagkat ako'y nainggit sa palalo; aking nakita ang kaginhawahan ng masama.

⁴ Sapagkat walang mga hapdi ang kanilang kamatayan, at ang kanilang katawan ay matataba.

⁵ Sila'y wala sa kaguluhan na gaya ng ibang mga tao; hindi sila nagdurusa na gaya ng ibang mga tao.

⁶ Kaya't ang kanilang kuwintas ay kapalaluan, ang karahasan ay tumatakip sa kanila bilang bihisan.

⁷ Ang kanilang mga mata ay lumuluwa sa katabaan, ang kanilang mga puso ay umaapaw sa kahangalan.

⁸ Sila'y nanlilibak at nagsasalita na may kasamaan, sila'y nagsasalita mula sa kaitaasan.

⁹ Kanilang inilagay ang kanilang mga bibig sa mga langit, at ang kanilang dila ay nagpapagala-gala sa ibabaw ng lupa.

¹⁰ Kaya't bumabalik dito ang kanyang bayan, at tubig ng kasaganaan ay iniinom nila.

¹¹ At kanilang sinasabi, "Paanong nalalaman ng Diyos? May kaalaman ba sa Kataas-taasan?"

¹² Narito, ang mga ito ang masasama; laging tiwasay, sa kayamanan ay sumasagana.

¹³ Sa walang kabuluhan ay pinanatili kong malinis ang aking puso, at ang aking mga kamay sa kawalang-sala ay hinuhugasan ko.

¹⁴ Sapagkat buong araw ako ay pinahihirapan, at tuwing umaga ay napaparusahan.

¹⁵ Kung aking sinabi, "Ako'y magsasalita ng ganito;" ako'y hindi magiging tapat sa salinlahi ng mga anak mo.

¹⁶ Ngunit nang aking isipin kung paano ito uunawain, sa akin ay parang napakahirap na gawain,

¹⁷ hanggang sa ako'y pumasok sa santuwaryo ng Diyos, saka ko naunawaan ang kanilang katapusan.

¹⁸ Tunay na sa madudulas na dako sila'y iyong inilalagay, iyong ibinabagsak sila sa kapahamakan.

¹⁹ Gaya na lamang ang pagkawasak nila sa isang iglap, tinatangay na lubusan ng mga sindak!

²⁰ Sila'y gaya ng panaginip kapag nagigising ang isang tao, sa pagkagising ang kanilang larawan ay hinahamak mo.

²¹ Nang ang aking kaluluwa ay nagdamdam, nang ang kalooban ko'y nasaktan,

²² ako'y naging hangal at mangmang; ako'y naging gaya ng hayop sa harapan mo.

²³ Gayunman ako'y kasama mong palagian, inaalalayan mo ang aking kanang kamay.

²⁴ Sa iyong payo ako'y iyong pinapatnubayan, at pagkatapos ay tatanggapin mo ako sa kaluwalhatian.

²⁵ Anong mayroon ako sa langit kundi ikaw? at liban sa iyo'y wala akong anumang ninanasa sa lupa.

²⁶ Ang aking laman at ang aking puso ay maaaring manghina, ngunit ang Diyos ang lakas ng aking puso at bahagi ko magpakailanman.

²⁷ Sapagkat narito, malilipol silang malayo sa iyo; ang lahat na hindi tapat sa iyo ay winakasan mo.

²⁸ Ngunit para sa akin, ang pagiging malapit ng Diyos ay aking kabutihan; ginawa kong aking kanlungan ang Panginoong DIYOS, upang aking maisaysay ang lahat ng iyong mga gawa.