Read Ang Bagong Ang Biblia Psalms 74 Bible Online

Psalms 74 - Ang Bagong Ang Biblia bible

Psalms 74

¹ O Diyos, bakit mo kami itinakuwil magpakailanman? Bakit ang iyong galit ay umuusok laban sa mga tupa ng iyong pastulan?

² Alalahanin mo ang iyong kapulungan na iyong binili noong una, na iyong tinubos upang maging lipi ng iyong mana! At ang bundok ng Zion na iyong tinahanan.

³ Itaas mo ang iyong mga hakbang sa mga walang hanggang guho; winasak ng kaaway ang lahat ng bagay sa santuwaryo!

⁴ Ang mga kaaway mo'y nagsisisigaw sa gitna ng iyong dakong tagpuan, itinaas nila ang kanilang mga watawat na palatandaan.

⁵ Sila'y tila mga tao na nagtaas ng mga palakol sa kagubatan ng mga punungkahoy.

⁶ At lahat ng mga kahoy na nililok ay kanilang binasag ng palakol at mga pamukpok.

⁷ Kanilang sinunog ang iyong santuwaryo; hanggang sa lupa, nilapastangan nila ang tahanang dako ng pangalan mo.

⁸ Sinabi nila sa kanilang sarili, "Ganap namin silang lulupigin," kanilang sinunog ang lahat ng dakong tagpuan ng Diyos sa lupain.

⁹ Hindi namin nakikita ang aming mga palatandaan; wala nang propeta pa; at walang sinuman sa amin na nakakaalam kung hanggang kailan.

¹⁰ O Diyos, hanggang kailan manlilibak ang kaaway? Lalapastanganin ba ng kaaway ang iyong pangalan magpakailanman?

¹¹ Bakit mo iniuurong ang iyong kamay? Mula sa loob ng iyong dibdib, puksain mo sila!

¹² Gayunman ang Diyos na aking Hari ay mula nang una, na gumagawa ng pagliligtas sa gitna ng lupa.

¹³ Hinawi mo ang dagat sa pamamagitan ng iyong kalakasan, binasag mo ang mga ulo ng mga dambuhala sa mga tubigan.

¹⁴ Dinurog mo ang mga ulo ng Leviatan, ibinigay mo siya bilang pagkain para sa mga nilalang sa ilang.

¹⁵ Ang mga bukal at mga batis ay iyong binuksan, iyong tinuyo ang mga batis na palagiang dinadaluyan.

¹⁶ Iyo ang araw at ang gabi man; iyong inihanda ang mga tanglaw at ang araw.

¹⁷ Itinakda mo ang lahat ng mga hangganan ng daigdig; iyong ginawa ang tag-init at ang taglamig.

¹⁸ Alalahanin mo ito, O PANGINOON, kung paanong nanlilibak ang kaaway, at isang masamang bayan ang lumalait sa iyong pangalan.

¹⁹ Sa mababangis na hayop, ang kaluluwa ng iyong kalapati ay huwag mong ibigay, huwag mong kalimutan ang buhay ng iyong dukha magpakailanman.

²⁰ Magkaroon ka ng pagpapahalaga sa iyong tipan; sapagkat ang madidilim na dako ng lupa ay puno ng mga tahanan ng karahasan.

²¹ Ang naaapi nawa'y huwag bumalik na may kahihiyan; purihin nawa ng dukha at nangangailangan ang iyong pangalan.

²² Bumangon ka, O Diyos, ang usapin mo'y ipaglaban; alalahanin mo kung paanong nililibak ka ng masasama buong araw!

²³ Huwag mong kalilimutan ang sigawan ng iyong mga kaaway, ang ingay ng iyong mga kaaway na patuloy na pumapailanglang!