Read Ang Bagong Ang Biblia Psalms 76 Bible Online

Psalms 76 - Ang Bagong Ang Biblia bible

Psalms 76

¹ Sa Juda ang Diyos ay kilala, ang kanyang pangalan sa Israel ay dakila.

² Natatag sa Salem ang kanyang tahanan, sa Zion ang kanyang dakong tirahan.

³ Doo'y binali niya ang humahagibis na mga palaso, ang kalasag, ang tabak, at mga sandata sa pakikidigma. (Selah)

⁴ Ikaw ay maluwalhati, higit na marangal, kaysa mga bundok na walang hanggan.

⁵ Ang matatapang ay inalisan ng kanilang samsam, sila'y lumubog sa pagkakatulog, at wala sa mga mandirigma ang makagamit ng kanilang mga kamay.

⁶ Sa iyong saway, O Diyos ni Jacob, ang mangangabayo at ang kabayo ay nahandusay sa mahimbing na pagkakatulog.

⁷ Ngunit ikaw, ikaw ay kakilakilabot! Sinong makakatayo sa iyong harapan, kapag minsang ang galit ay napukaw?

⁸ Mula sa langit ang hatol ay iyong ipinarinig, ang lupa ay natakot, at tumahimik,

⁹ nang ang Diyos ay bumangon sa paghatol, upang iligtas ang lahat ng naaapi sa sandaigdigan. (Selah)

¹⁰ Tunay na pupurihin ka ng poot ng tao; ang nalabi sa poot ay ibibigkis mo sa iyo.

¹¹ Mamanata ka sa PANGINOON mong Diyos, at tuparin mo ang mga iyon, magdala nawa ng mga kaloob ang lahat ng nasa kanyang palibot, sa kanya na nararapat pag-ukulan ng takot,

¹² siyang pumuputol ng espiritu ng mga pinuno, na kinatatakutan ng mga hari sa mundo.