Read Ang Bagong Ang Biblia Psalms 77 Bible Online

Psalms 77 - Ang Bagong Ang Biblia bible

Psalms 77

¹ Ang aking tinig ay papailanglang sa Diyos, at ako'y dadaing ng malakas; ang aking tinig ay papailanglang sa Diyos, at papakinggan niya ako.

² Hinahanap ko ang Panginoon sa araw ng aking kaguluhan; sa gabi'y nakaunat ang aking kamay, at hindi nangangalay; ang kaluluwa ko'y tumatangging mabigyang kaaliwan.

³ Naaalala ko ang Diyos, at ako'y nababalisa; nang ako'y nagdaramdam, ang diwa ko'y nanlulupaypay. (Selah)

⁴ Pinigilan mong magsara ang talukap ng aking mga mata, ako'y totoong naguguluhan at hindi ako makapagsalita.

⁵ Ginugunita ko ang mga unang araw, ang mga taong nagdaan.

⁶ Sa gabi'y nakikipag-usap ako sa aking puso; ako'y magbubulay-bulay sa aking puso at ang aking diwa ay magsisiyasat.

⁷ "Magtatakuwil ba ang Panginoon magpakailanman? At hindi na ba muling masisiyahan?

⁸ Ang kanya bang tapat na pag-ibig ay huminto na magpakailanman? Ang kanya bang mga pangako sa lahat ng panahon ay nawakasan?

⁹ Nakalimot na ba ang Diyos na maging mapagbiyaya? Sa kanya bang galit ay isinara niya ang kanyang awa? (Selah)

¹⁰ At aking sinabi, "Ipinaghihinagpis ko na ang kanang kamay ng Kataas-taasan ay nagbago."

¹¹ Aking gugunitain ang mga gawa ng PANGINOON; Oo, aking aalalahanin ang mga kahanga-hangang gawa mo noong unang panahon.

¹² Ako'y magbubulay-bulay sa lahat mong mga gawa, at magmumuni tungkol sa iyong mga gawa.

¹³ Ang iyong daan, O Diyos, ay banal. Sinong diyos ang dakila na gaya ng aming Diyos?

¹⁴ Ikaw ang Diyos na gumagawa ng mga kababalaghan, na nagpahayag ng iyong kalakasan sa gitna ng mga bayan.

¹⁵ Tinubos mo ng iyong kamay ang iyong bayan, ang mga anak ni Jacob at ni Jose. (Selah)

¹⁶ Nang makita ka ng tubig, O Diyos; nang makita ka ng tubig, sila'y natakot: Oo, ang kalaliman ay nanginig.

¹⁷ Ang alapaap ay nagbuhos ng tubig; nagpakulog ang himpapawid, ang mga palaso mo ay humagibis sa bawat panig.

¹⁸ Ang tunog ng iyong kulog ay nasa ipu-ipo; pinagliwanag ng mga kidlat ang daigdig; ang lupa ay nanginig at nayanig.

¹⁹ Ang daan mo'y nasa dagat, ang landas mo'y nasa malalaking tubig; gayunman ang bakas mo'y hindi nakita.

²⁰ Iyong pinatnubayan ang iyong bayan na parang kawan sa pamamagitan ng kamay ni Moises at ni Aaron.