Read Ang Bagong Ang Biblia Psalms 80 Bible Online

Psalms 80 - Ang Bagong Ang Biblia bible

Psalms 80

¹ O Pastol ng Israel, iyong pakinggan, ikaw na pumapatnubay kay Jose na parang kawan; ikaw na nakaluklok sa trono sa ibabaw ng mga kerubin, ikaw ay magliwanag

² sa harapan ng Efraim, ng Benjamin at ng Manases! Pakilusin mo ang iyong kapangyarihan, at pumarito ka upang kami'y iligtas.

³ Panunumbalikin mo kami, O Diyos; paliwanagin mo ang iyong mukha, upang kami ay maligtas!

⁴ O PANGINOONG Diyos ng mga hukbo, hanggang kailan ka magagalit sa dalangin ng bayan mo?

⁵ Iyong pinakain sila ng tinapay ng mga luha, at binigyan mo sila ng maiinom na mga luhang sagana.

⁶ Ginawa mo kaming kaalitan sa aming mga kalapit-bansa, at ang mga kaaway namin ay nagtatawanang sama-sama.

⁷ Panunumbalikin mo kami, O Diyos ng mga hukbo; paliwanagin mo ang iyong mukha upang kami ay maligtas!

⁸ Ikaw ay nagdala ng isang puno ng ubas mula sa Ehipto; iyong pinalayas ang mga bansa, at itinanim mo ito.

⁹ Inihanda mo ang lupa para doon, ito'y nag-ugat nang malalim at pinuno ang lupain.

¹⁰ Ang mga bundok ay natakpan ng lilim niyon, ang malalaking sedro at ang mga sanga nito,

¹¹ ang kanyang mga sanga hanggang sa dagat ay umabot, at ang kanyang mga supling hanggang sa Ilog.

¹² Bakit mo ibinagsak ang mga pader niya, anupa't lahat ng dumaraan ay pumipitas ng kanyang bunga?

¹³ Sinisira ito ng baboy-damo na mula sa kagubatan, at nanginginain doon ang lahat ng gumagalaw sa parang.

¹⁴ Bumalik kang muli, O Diyos ng mga hukbo, isinasamo namin sa iyo. Tumungo ka mula sa langit, at masdan mo; pahalagahan mo ang puno ng ubas na ito,

¹⁵ ang punong itinanim ng kanang kamay mo, at sa anak na iyong pinalaki para sa iyong sarili.

¹⁶ Sinunog nila iyon sa apoy, iyon ay kanilang pinutol; sa saway ng iyong mukha sila'y nalipol!

¹⁷ Ipatong nawa ang iyong kamay sa tao ng kanang kamay mo, sa anak ng tao na iyong pinalakas para sa sarili mo.

¹⁸ Sa gayo'y hindi kami tatalikod sa iyo; bigyan mo kami ng buhay, at tatawag kami sa pangalan mo.

¹⁹ Panunumbalikin mo kami, O PANGINOONG Diyos ng mga hukbo; paliwanagin mo ang iyong mukha, upang kami ay maligtas!