Read Ang Bagong Ang Biblia Psalms 81 Bible Online

Psalms 81 - Ang Bagong Ang Biblia bible

Psalms 81

¹ Umawit kayo nang malakas sa Diyos na ating kalakasan; sumigaw sa Diyos ni Jacob dahil sa kagalakan!

² Umawit kayo at patunugin ninyo ang pandereta, ang masayang lira at ang alpa.

³ Hipan ninyo ang trumpeta kapag bagong buwan, sa kabilugan ng buwan, sa ating araw ng pagdiriwang.

⁴ Sapagkat ito ay isang tuntunin para sa Israel, isang batas ng Diyos ni Jacob.

⁵ Ginawa niya itong patotoo sa Jose, nang siya'y lumabas sa lupain ng Ehipto. Ako'y nakarinig ng tinig na hindi ko kilala:

⁶ "Pinagaan ko ang pasan sa iyong balikat; ang iyong mga kamay ay pinabitiw sa basket.

⁷ Ikaw ay tumawag nang nasa kaguluhan, at iniligtas kita; sinagot kita sa lihim na dako ng kulog; sinubok kita sa tubig ng Meriba. (Selah)

⁸ O bayan ko, habang kita'y pinaaalalahanan, ako'y iyong dinggin, O Israel, kung ikaw sana'y makikinig sa akin!

⁹ Hindi magkakaroon ng ibang diyos sa inyo; at huwag kang yuyukod sa ibang diyos.

¹⁰ Ako ang PANGINOON mong Diyos, na naglabas sa iyo mula sa lupain ng Ehipto. Buksan mo nang maluwang ang iyong bibig, at ito'y aking pupunuin.

¹¹ "Ngunit ang aking bayan ay hindi nakinig sa aking tinig; hindi ako sinunod ng Israel.

¹² Kaya't ipinaubaya ko sila sa pagmamatigas ng kanilang puso, upang sumunod sa kanilang sariling mga payo.

¹³ O kung ako sana'y papakinggan ng aking bayan, ang Israel ay lalakad sa aking mga daan!

¹⁴ Pasusukuin ko kaagad ang kanilang mga kaaway, at ibabaling ko ang aking kamay laban sa kanilang mga kalaban.

¹⁵ Ang mga napopoot sa PANGINOON ay yuyuko sa kanya, at ang kanilang panahon ay magtatagal kailanman.

¹⁶ Pakakainin kita ng pinakamabuting trigo, at bubusugin kita ng pulot na mula sa bato."