Read Ang Bagong Ang Biblia Psalms 83 Bible Online

Psalms 83 - Ang Bagong Ang Biblia bible

Psalms 83

¹ O Diyos, huwag kang tumahimik; huwag kang manahimik o maging walang kibo, O Diyos!

² Sapagkat ang mga kaaway mo'y nagkakagulo, silang napopoot sa iyo ay nagtaas ng kanilang mga ulo.

³ Sila'y naghanda ng mga tusong panukala laban sa iyong bayan, sila'y nagsanggunian laban sa iyong mga iniingatan.

⁴ Kanilang sinasabi, "Pumarito kayo, bilang isang bansa'y pawiin natin sila, upang ang pangalan ng Israel ay huwag nang maalala pa!"

⁵ Oo, sila'y nagsabwatan na may pagkakaisa, laban sa iyo ay nagtipanan sila —

⁶ ang mga tolda ng Edom at ng mga Ismaelita; ang Moab at ang mga Hagrita,

⁷ ang Gebal, ang Ammon, at ang Amalek; ang Filisteo at ang mga taga-Tiro;

⁸ ang Asiria ay kumampi rin sa kanila; sila ay maging bisig sa mga anak ni Lot. (Selah)

⁹ Gawin mo sa kanila ng gaya sa Midian; gaya ng kay Sisera at kay Jabin sa Ilog ng Kison,

¹⁰ na namatay sa Endor; na naging dumi para sa lupa.

¹¹ Gawin ang kanilang mga maharlika na gaya nina Oreb at Zeeb; lahat nilang mga pinuno na gaya nina Zeba at Zalmuna;

¹² na nagsabi, "Angkinin natin para sa ating sarili ang mga pastulan ng Diyos."

¹³ O Diyos ko, gawin mo silang gaya ng alabok na paikut-ikot, parang dayami sa harap ng hangin.

¹⁴ Gaya ng apoy na sumusunog ng gubat, gaya ng liyab na tumutupok ng mga bundok;

¹⁵ kaya't habulin mo sila ng iyong bagyo, at takutin mo sila ng iyong buhawi!

¹⁶ Punuin mo ang kanilang mga mukha ng kahihiyan, O PANGINOON, upang hanapin nila ang iyong pangalan.

¹⁷ Mapahiya at masiraan nawa sila ng loob magpakailanman; malipol nawa sila at mapahiya.

¹⁸ Malaman nawa nila na ikaw lamang, na PANGINOON ang pangalan, ang sa buong lupa ay Kataas-taasan.