Read Ang Bagong Ang Biblia Psalms 85 Bible Online

Psalms 85 - Ang Bagong Ang Biblia bible

Psalms 85

¹ PANGINOON, ikaw ay naging mabuti sa iyong lupain, ibinalik mo ang kayamanan ng Jacob.

² Pinatawad mo ang kasamaan ng iyong bayan, pinatawad mo ang lahat nilang kasalanan. (Selah)

³ Inalis mo ang lahat ng poot mo, tumalikod ka sa bangis ng galit mo.

⁴ O Diyos ng aming kaligtasan, muli mo kaming panumbalikin, at alisin mo ang iyong galit sa amin.

⁵ Magagalit ka ba sa amin magpakailanman? Ipagpapatuloy mo ba ang iyong galit sa lahat ng salinlahi?

⁶ Hindi ba kami ay muling bubuhayin mo, upang ang iyong bayan ay magalak sa iyo?

⁷ O PANGINOON, ipakita mo sa amin ang iyong tapat na pagsuyo, at ipagkaloob mo sa amin ang pagliligtas mo.

⁸ Aking papakinggan kung ano ang sasabihin ng Diyos na PANGINOON, sapagkat siya'y magsasalita ng kapayapaan sa kanyang bayan at sa kanyang mga banal, ngunit huwag silang muling manumbalik sa kahangalan.

⁹ Tunay na ang kanyang pagliligtas ay malapit sa kanila na natatakot sa kanya; upang ang kaluwalhatian ay manahan sa aming lupain.

¹⁰ Magsasalubong ang tapat na pag-ibig at katapatan, ang katuwiran at kapayapaan ay maghahalikan.

¹¹ Bubukal sa lupa ang katotohanan, at tumitingin mula sa langit ang katuwiran.

¹² Oo, ibibigay ng PANGINOON kung ano ang mabuti; at ang ating lupain ay magbibigay ng kanyang ani.

¹³ Mangunguna sa kanya ang katuwiran, at ang kanyang mga yapak ay gagawing daan.