Read Ang Bagong Ang Biblia Psalms 86 Bible Online

Psalms 86 - Ang Bagong Ang Biblia bible

Psalms 86

¹ Ikiling mo ang iyong pandinig, O PANGINOON, at ako'y sagutin mo, sapagkat dukha at nangangailangan ako.

² Ingatan mo ang aking buhay, sapagkat ako'y banal na tao. Ikaw na aking Diyos, iligtas mo ang iyong lingkod na nagtitiwala sa iyo.

³ O Panginoon, maawa ka sa akin, sapagkat sa buong araw sa iyo ako'y dumaraing.

⁴ Pasayahin mo ang kaluluwa ng lingkod mo, sapagkat sa iyo, O Panginoon itinataas ko ang kaluluwa ko.

⁵ Sapagkat ikaw, Panginoon, ay mabuti at mapagpatawad, sagana sa tapat na pag-ibig sa lahat ng sa iyo ay tumatawag.

⁶ Pakinggan mo, O PANGINOON, ang aking panalangin, pakinggan mo ang tinig ng aking daing.

⁷ Sa araw ng aking kaguluhan ay tumatawag ako sa iyo; sapagkat sinasagot mo ako.

⁸ Walang gaya mo sa gitna ng mga diyos, O Panginoon; ni mayroong anumang mga gawang gaya ng sa iyo.

⁹ Lahat ng mga bansa na iyong nilalang ay darating at sasamba sa harapan mo, O Panginoon; at ang iyong pangalan ay kanilang luluwalhatiin.

¹⁰ Sapagkat ikaw ay dakila at gumagawa ng kahanga-hangang mga bagay, ikaw lamang ang Diyos.

¹¹ O PANGINOON, ituro mo sa akin ang iyong daan, upang makalakad ako sa iyong katotohanan; ilakip mo ang aking puso upang matakot sa iyong pangalan.

¹² Nagpapasalamat ako sa inyo ng buong puso, O Panginoon kong Diyos, at luluwalhatiin ko ang iyong pangalan magpakailanman.

¹³ Sapagkat dakila ang iyong tapat na pagsinta sa akin; sa kalaliman na Sheol ay iniligtas mo ang aking kaluluwa.

¹⁴ O Diyos, ang mga taong mayabang ay nagbangon laban sa akin, isang pangkat ng malulupit na tao ang nagtatangka sa aking buhay, at hindi ka nila isinaalang-alang sa harapan nila.

¹⁵ Ngunit ikaw, O Panginoon, ay Diyos na mahabagin at mapagbiyaya, banayad sa pagkagalit, sa tapat na pag-ibig at katapatan ay sagana.

¹⁶ Lingunin mo ako, maawa ka sa akin; ibigay mo ang lakas mo sa iyong lingkod, at iligtas mo ang anak ng iyong lingkod na babae.

¹⁷ Pagpakitaan mo ako ng tanda para sa kabutihan, upang makita ng mga napopoot sa akin at mapahiya, sapagkat ikaw, PANGINOON, ay tumulong at umaliw sa akin.