Read Ang Bagong Ang Biblia Psalms 88 Bible Online

Psalms 88 - Ang Bagong Ang Biblia bible

Psalms 88

¹ O PANGINOON, Diyos ng aking kaligtasan, ako'y dumaing araw at gabi sa harap mo.

² Paratingin mo nawa ang aking panalangin sa harapan mo, ang iyong pandinig sa aking daing ay ikiling mo!

³ Sapagkat ang aking kaluluwa ay puno ng mga kaguluhan, at papalapit sa Sheol ang aking buhay.

⁴ Ako'y ibinilang sa kanila na bumababa sa Hukay; ako'y taong walang lakas,

⁵ gaya ng pinabayaan sa gitna ng mga patay, gaya ng pinatay na nakahiga sa libingan, gaya ng mga hindi mo na inaalala, sapagkat sila'y inihiwalay sa iyong kamay.

⁶ Inilagay mo ako sa pinakamalalim na Hukay, sa madidilim na dako at kalaliman.

⁷ Ang iyong poot ay mabigat na sa akin ay nakapatong, at iyong sinaktan ako ng lahat mong mga alon. (Selah)

⁸ Pinalayo mo sa akin ang aking mga kasamahan; ginawa mo akong isang bagay na kanilang katatakutan. Ako'y nakakulong upang ako'y hindi makatakas;

⁹ dahil sa kalungkutan ay lumabo ang mata ko, O PANGINOON, araw-araw ay tumatawag ako sa iyo, aking iniabot sa iyo ang mga kamay ko.

¹⁰ Gagawa ka ba ng mga kababalaghan para sa mga patay? Ang mga patay ba ay babangon upang purihin ka? (Selah)

¹¹ Ang iyo bang tapat na pag-ibig ay ipahahayag sa libingan, o sa Abadon ang iyong katapatan?

¹² Ang iyo bang mga kababalaghan ay malalaman sa kadiliman, o ang iyong katuwiran sa lupain ng pagkalimot?

¹³ O PANGINOON, ako sa iyo'y dumaraing, sa umaga'y dumarating sa harapan mo ang aking panalangin.

¹⁴ O PANGINOON, bakit mo itinatakuwil ang aking kaluluwa? Bakit mo ikinukubli ang iyong mukha sa akin?

¹⁵ Pinahihirapan at malapit sa kamatayan mula sa aking kabataan, tiniis ko ang pagkatakot sa iyo, wala akong kakayahan.

¹⁶ Ang iyong mabangis na poot ay dumaan sa akin, winasak ako ng iyong mga kakilakilabot na bagay.

¹⁷ Kanilang pinaligiran ako na gaya ng tubig sa buong araw; kinubkob nila akong magkakasama.

¹⁸ Inalis mo sa akin ang aking mangingibig at kaibigan, ang aking mga kasamahan ay nasa kadiliman.