Read Ang Bagong Ang Biblia Psalms 89 Bible Online

Psalms 89 - Ang Bagong Ang Biblia bible

Psalms 89

¹ Aking aawitin ang iyong tapat na pag-ibig magpakailanman, O PANGINOON, sa pamamagitan ng aking bibig ay ipahahayag ko sa lahat ng salinlahi ang katapatan mo.

² Sapagkat aking sinabi, ang tapat na pag-ibig ay matatatag kailanman, itatag mo sa mga langit ang iyong katapatan.

³ "Ako'y nakipagtipan sa aking hinirang, ako'y sumumpa kay David na aking lingkod:

⁴ 'Ang mga binhi mo'y itatatag ko magpakailanman, at aking itatayo ang iyong trono para sa lahat ng salinlahi.'” (Selah)

⁵ Purihin nawa ng langit ang iyong mga kahanga-hangang gawa, O PANGINOON, ang katapatan mo sa kapulungan ng mga banal!

⁶ Sapagkat sino sa langit ang maihahambing sa PANGINOON? Sino sa mga nilalang sa langit ang gaya ng PANGINOON,

⁷ isang Diyos na kinatakutan sa kapulungan ng mga banal, dakila at kakilakilabot kaysa lahat ng nasa palibot niya?

⁸ O PANGINOONG Diyos ng mga hukbo, sino ang makapangyarihang gaya mo, O PANGINOON? Ang iyong katapatan ay nakapaligid sa iyo.

⁹ Iyong pinamumunuan ang pagngangalit ng dagat; kapag tumataas ang mga alon nito, ang mga iyon ay pinatatahimik mo.

¹⁰ Iyong dinurog ang Rahab na tulad sa pinatay, pinangalat mo ng iyong makapangyarihang bisig ang iyong mga kaaway.

¹¹ Ang langit ay iyo, maging ang lupa ay iyo, ang sanlibutan at ang lahat ng narito ay itinatag mo.

¹² Ang hilaga at ang timog ay iyong nilalang, ang Tabor at ang Hermon ay magalak na nagpuri sa iyong pangalan.

¹³ Ikaw ay may makapangyarihang bisig; malakas ang iyong kamay, mataas ang iyong kanang kamay.

¹⁴ Ang katuwiran at katarungan ang mga saligan ng iyong trono, ang tapat na pag-ibig at katapatan ay nagpapauna sa iyo.

¹⁵ Mapalad ang bayan na nakakaalam ng masayang sigaw, na nagsisilakad sa liwanag ng iyong mukha, O PANGINOON;

¹⁶ na nagagalak sa iyong pangalan sa buong araw; at itinaas sa pamamagitan ng iyong katuwiran.

¹⁷ Sapagkat ikaw ang kaluwalhatian ng kanilang lakas, sa pamamagitan ng iyong kagandahang-loob ang aming tambuli ay itinaas.

¹⁸ Sapagkat ang aming kalasag ay mula sa PANGINOON, ang aming hari sa Banal ng Israel.

¹⁹ Nang una ay nagsalita ka sa pangitain sa iyong mga tapat na lingkod, at iyong sinabi, "Aking ibinigay ang tulong sa isang makapangyarihan; aking itinaas ang isang hinirang mula sa bayan.

²⁰ Si David na aking lingkod ay aking natagpuan, ng aking banal na langis siya ay aking pinahiran,

²¹ na sa pamamagitan niya ang aking kamay ay maitatatag, ang bisig ko rin ang magpapalakas sa kanya.

²² Hindi siya malilinlang ng kaaway; ni hindi siya masasaktan ng masama.

²³ Dudurugin ko ang kanyang mga kaaway sa harapan niya, at ibubuwal ko ang mga napopoot sa kanya.

²⁴ Ang aking pagtatapat at taimtim na pag-ibig ay magiging kanya, at sa pangalan ko'y matataas ang sungay niya.

²⁵ Aking itatatag ang kanyang kamay sa dagat, at ang kanyang kanang kamay sa mga ilog.

²⁶ Siya'y dadaing sa akin, 'Ikaw ay Ama ko, Malaking Bato ng aking kaligtasan at Diyos ko.'

²⁷ Gagawin ko siyang panganay, ang pinakamataas sa mga hari sa lupa.

²⁸ Iingatan ko para sa kanya magpakailanman ang pag-ibig kong tapat, at ang tipan ko para sa kanya magiging matatag.

²⁹ Aking itatatag ang kanyang lahi magpakailanman, at ang kanyang trono na gaya ng mga araw ng langit.

³⁰ Kung tatalikuran ang aking kautusan ng kanyang mga anak, at hindi lumakad sa aking mga batas,

³¹ at ang aking mga tuntunin ay kanilang labagin, at ang aking mga utos ay hindi nila sundin,

³² kung magkagayo'y ang kanilang mga pagsuway, sa pamamagitan ng pamalo ay aking parurusahan, at sa pamamagitan ng mga hampas ang kanilang kasamaan.

³³ Ngunit hindi ko aalisin sa kanya ang aking tapat na pagmamahal, o maging hindi tunay sa aking katapatan.

³⁴ Ang aking tipan ay hindi ko lalabagin, ni ang salita na lumabas sa aking mga labi ay aking babaguhin.

³⁵ Minsan at magpakailanman ay sumumpa ako sa pamamagitan ng aking kabanalan, kay David ay hindi ako magsisinungaling.

³⁶ Ang kanyang mga lahi ay mananatili magpakailanman; ang kanyang trono ay magiging gaya ng araw sa aking harapan.

³⁷ Gaya ng buwan, ito ay matatatag magpakailanman, at tapat ang saksi sa kalangitan." (Selah)

³⁸ Ngunit ngayo'y iyong itinakuwil at tinanggihan, ikaw ay puno ng galit sa iyong pinahiran ng langis.

³⁹ Iyong tinalikuran ang tipan ng iyong lingkod; dinungisan mo ang kanyang korona sa alabok.

⁴⁰ Giniba mo ang lahat ng mga pader niya, ang kanyang mga tanggulan ay iginuho mo pa.

⁴¹ Sinamsaman siya ng lahat ng dumadaan sa lansangan, siya'y naging katawa-tawa sa kariyang kapwa.

⁴² Iyong itinaas ang kanang kamay ng kanyang mga kaaway; iyong pinagalak ang lahat niyang mga kalaban.

⁴³ Oo, iyong ibinaligtad ang talim ng kanyang tabak, at hindi mo siya itinayo sa pakikipaglaban.

⁴⁴ Ginawa mong maglaho ang kanyang kakinangan, at sa lupa'y inihagis mo ang kanyang trono.

⁴⁵ Iyong pinaikli ang mga araw ng kanyang kabataan, tinakpan mo siya ng kahihiyan. (Selah)

⁴⁶ O PANGINOON, hanggang kailan ka magkukubli magpakailanman? Ang pagniningas ng iyong poot na parang apoy ay hanggang kailan?

⁴⁷ Alalahanin mo kung ano ang sukat ng buhay ko, sa anong walang kabuluhan nilalang mo ang lahat ng mga anak ng mga tao!

⁴⁸ Sinong tao ang mabubuhay at hindi makakakita ng kamatayan? Maililigtas ba niya ang kanyang kaluluwa sa kapangyarihan ng Sheol? (Selah)

⁴⁹ Panginoon, nasaan ang dati mong tapat na pag-ibig, na iyong isinumpang may katapatan kay David?

⁵⁰ Alalahanin mo, O PANGINOON, kung paano nilibak ang lingkod mo, kung paanong sa aking dibdib ang paghamak ng mga bayan ay taglay ko,

⁵¹ na itinuya ng iyong mga kaaway, O PANGINOON, na sa pamamagitan nito ay kanilang pinagtatawanan ang mga bakas ng iyong pinahiran ng langis.

⁵² Purihin ang PANGINOON magpakailanman! Amen at Amen.