Read Ang Bagong Ang Biblia Psalms 90 Bible Online

Psalms 90 - Ang Bagong Ang Biblia bible

Psalms 90

¹ Panginoon, ikaw ay naging aming tahanang dako sa lahat ng salinlahi.

² Bago nilikha ang mga bundok, o bago mo nilikha ang lupa at ang sanlibutan, ikaw ay Diyos, mula sa walang hanggan hanggang sa walang hanggan.

³ Iyong ibinabalik ang tao sa alabok, at iyong sinasabi, "Bumalik kayo, kayong mga anak ng mga tao!"

⁴ Sapagkat ang isang libong taon sa iyong paningin, ay parang kahapon lamang kapag ito'y nakalipas, o gaya ng isang gabing pagbabantay.

⁵ Iyong dinadala sila na parang baha, sila'y nakatulog, kinaumagahan ay parang damo na tumutubo;

⁶ sa umaga ito'y nananariwa at lumalago, sa hapon ito'y nalalanta at natutuyo.

⁷ Sapagkat ang iyong galit ang sa amin ay tumupok, at sa pamamagitan ng iyong galit kami ay nabagabag.

⁸ Inilagay mo ang aming kasamaan sa iyong harapan, sa liwanag ng iyong mukha ang lihim naming kasalanan.

⁹ Sapagkat sa ilalim ng iyong poot, lahat ng aming araw ay lumilipas, na gaya ng buntong-hininga, ang aming mga taon ay nagwawakas.

¹⁰ Ang mga taon ng aming buhay ay pitumpung taon, o kung malakas kami ay walumpung taon, ngunit ang mga ito ay hirap at kaguluhan lamang, ang mga ito'y madaling lumipas, at kami ay nawawala.

¹¹ Sinong nakakaalam ng kapangyarihan ng galit mo, at ng iyong galit ayon sa pagkatakot na marapat sa iyo?

¹² Kaya't turuan mo kami na bilangin ang aming mga araw, upang kami ay magkaroon ng pusong may karunungan.

¹³ Manumbalik ka, O PANGINOON! Hanggang kailan pa? Sa iyong mga lingkod ay mahabag ka!

¹⁴ Busugin mo kami sa umaga ng iyong tapat na pagmamahal, upang kami ay magalak at matuwa sa lahat ng aming mga araw.

¹⁵ Kami ay iyong pasayahin ayon sa dami ng mga araw ng iyong pagpapahirap sa amin, at kasindami ng mga taon na ang kasamaan nakita namin.

¹⁶ Mahayag nawa ang gawa mo sa iyong mga lingkod, at ang kaluwalhatian mo sa kanilang mga anak.

¹⁷ Sumaamin nawa ang biyaya ng Panginoon naming Diyos, at iyong itatag sa amin ang gawa ng aming mga kamay; Oo, itatag mo ang gawa ng aming mga kamay.