Read Ang Bagong Ang Biblia Psalms 91 Bible Online

Psalms 91 - Ang Bagong Ang Biblia bible

Psalms 91

¹ Siyang naninirahan sa tirahan ng Kataas-taasan, ay mananatili sa lilim ng Makapangyarihan,

² sasabihin ko sa PANGINOON, "Aking muog at aking kanlungan, aking Diyos na siya kong pinagtitiwalaan."

³ Sapagkat ililigtas ka niya sa bitag ng maninilo, at sa nakakamatay na salot.

⁴ Kanyang tatakpan ka ng mga bagwis niya, at sa ilalim ng kanyang mga pakpak ay manganganlong ka; ang kanyang katapatan ay baluti at panangga.

⁵ Ang mga nakakakilabot sa gabi ay di mo katatakutan, ni ang pana na nagliliparan kapag araw;

⁶ ni ang salot na lihim na bumubuntot sa kadiliman, ni ang pagkawasak na sumisira sa katanghalian.

⁷ Mabubuwal sa iyong tabi ang isang libo, sa iyong kanan ay sampung libo, ngunit ito'y hindi lalapit sa iyo.

⁸ Mamamasdan mo lamang sa pamamagitan ng iyong mga mata, at iyong makikita ang parusa sa masama.

⁹ Sapagkat ikaw, O PANGINOON, ay aking kanlungan! Ang Kataas-taasan bilang iyong tahanan;

¹⁰ walang kasamaang darating sa iyo, walang parusang lalapit sa tolda mo.

¹¹ Sapagkat siya'y magbibilin sa kanyang mga anghel tungkol sa iyo, upang sa lahat ng iyong mga lakad ay ingatan ka.

¹² Sa kanilang mga kamay ay dadalhin ka nila, baka sa isang bato'y matisod ang iyong paa.

¹³ Iyong tatapakan ang leon at ang ulupong, tatapakan mo ng iyong paa ang ahas at batang leon.

¹⁴ Sapagkat siya'y kumapit sa akin na may pag-ibig, ililigtas ko siya, iingatan ko siya sapagkat ang aking pangalan ay nalalaman niya.

¹⁵ Siya'y tatawag sa akin at sasagutin ko siya; ako'y magiging kasama niya sa kabalisahan, sasagipin ko siya at pararangalan ko siya.

¹⁶ Aking bubusugin siya ng mahabang buhay, at ipapakita sa kanya ang aking pagliligtas.