Read Ang Bagong Ang Biblia Psalms 96 Bible Online

Psalms 96 - Ang Bagong Ang Biblia bible

Psalms 96

¹ O umawit sa PANGINOON ng bagong awit; umawit sa PANGINOON ang buong lupa.

² Umawit kayo sa PANGINOON, purihin ninyo ang pangalan niya; ipahayag ninyo ang kanyang pagliligtas sa araw-araw.

³ Ipahayag ninyo sa mga bansa ang kanyang kaluwalhatian, ang kagila-gilalas niyang mga gawa sa lahat ng mga bayan!

⁴ Sapagkat dakila ang PANGINOON, at karapat-dapat na purihin; siya'y dapat katakutan nang higit kaysa lahat na diyos.

⁵ Sapagkat lahat ng mga diyos sa mga bayan ay mga diyus-diyosan, ngunit ang PANGINOON ang lumikha ng mga kalangitan.

⁶ Nasa harapan niya ang karangalan at kamahalan, nasa kanyang santuwaryo ang lakas at kagandahan.

⁷ Ibigay ninyo sa PANGINOON, kayong mga angkan ng mga bayan, ibigay ninyo sa PANGINOON ang kaluwalhatian at kalakasan.

⁸ Ibigay ninyo sa PANGINOON ang kaluwalhatiang nararapat sa kanyang pangalan; magdala ng handog, at pumasok kayo sa kanyang mga bulwagan!

⁹ Sambahin ninyo ang PANGINOON sa kagandahan ng kabanalan, manginig kayong buong lupa sa kanyang harapan!

¹⁰ Sabihin ninyo sa mga bansa, "Ang PANGINOON ay naghahari! Oo, matatag at hindi makikilos ang sanlibutan, hahatulan niyang may katarungan ang mga bayan."

¹¹ Matuwa nawa ang langit at magalak nawa ang lupa; umugong nawa ang dagat, at ang lahat ng naroroon;

¹² maging masaya nawa ang bukiran at lahat ng naroon. Kung gayo'y aawit dahil sa kagalakan ang lahat ng punungkahoy sa gubat

¹³ sa harapan ng PANGINOON; sapagkat siya'y dumarating, sapagkat siya'y dumarating upang hatulan ang lupa. Kanyang hahatulan na may katuwiran ang sanlibutan, at ng kanyang katotohanan ang mga bayan.