Read Ang Bagong Ang Biblia Proverbs 13 Bible Online

Proverbs 13 - Ang Bagong Ang Biblia bible

Proverbs 13

¹ Ang turo ng ama'y dinirinig ng matalinong anak, ngunit hindi nakikinig sa saway ang manlilibak.

² Ang tao mula sa bunga ng kanyang bibig ay kakain ng kabutihan, ngunit ang pagnanasa ng mandaraya ay karahasan.

³ Ang nag-iingat ng kanyang bibig ay nag-iingat ng kanyang buhay; ngunit ang nagbubuka nang maluwang ng kanyang mga labi ay hahantong sa kapahamakan.

⁴ Ang kaluluwa ng tamad ay nagnanasa at walang nakukuha, ngunit ang kaluluwa ng masipag ay tutustusang sagana.

⁵ Ang taong matuwid ay namumuhi sa kasinungalingan, ngunit ang gawa ng masama ay kahiyahiya at kasuklamsuklam.

⁶ Ang may matuwid na lakad ay binabantayan ng katuwiran, ngunit ibinabagsak ng pagkakasala ang makasalanan.

⁷ May nagkukunwaring mayaman, subalit wala naman, may nagpapanggap na dukha, gayunma'y napakayaman.

⁸ Ang pantubos sa buhay ng tao ay ang kanyang kayamanan, ngunit ang dukha ay walang banta sa kanyang buhay.

⁹ Ang ilaw ng matuwid ay natutuwa, ngunit ang tanglaw ng masama ay mawawala.

¹⁰ Sa kapalaluan, ang suwail ay lumilikha ng gulo, ngunit ang karunungan ay nasa mga tumatanggap ng payo.

¹¹ Mauubos ang kayamanang nakuha sa madaling paraan, ngunit siyang unti-unting nagtitipon ay madaragdagan.

¹² Nagpapasakit ng puso ang pag-asang naaantala, ngunit punungkahoy ng buhay ang natupad na nasa.

¹³ Ang humahamak sa salita, sa sarili'y nagdadala ng kapahamakan, ngunit ang gumagalang sa utos ay gagantimpalaan.

¹⁴ Ang kautusan ng matalino ay bukal ng buhay, upang makaiwas ang tao sa mga bitag ng kamatayan.

¹⁵ Ang mabuting pagpapasiya'y nagbubunga ng pagpapala, ngunit ang lakad ng di tapat ang kanilang ikasisira.

¹⁶ Sa bawat bagay ang matalinong tao ay gumagawang may kaalaman; ngunit ang hangal ay nagkakalat ng kanyang kahangalan.

¹⁷ Ang masamang sugo ay naghuhulog sa tao sa kaguluhan, ngunit ang tapat na sugo ay may dalang kagalingan.

¹⁸ Kahirapan at kahihiyan ang darating sa nagtatakuwil ng pangaral, ngunit siyang nakikinig sa saway ay pararangalan.

¹⁹ Ang pagnanasang natupad ay matamis sa kaluluwa; ngunit kasuklamsuklam sa mga hangal ang humiwalay sa masama.

²⁰ Ang lumalakad na kasama ng matatalino ay magiging matalino rin, ngunit ang kasama ng mga hangal, kapahamakan ang daranasin.

²¹ Ang kasawian ay humahabol sa mga makasalanan, ngunit ang matuwid ay ginagantimpalaan ng kasaganaan.

²² Ang mabuting tao ay nag-iiwan ng mana sa mga anak ng kanyang mga anak; ngunit ang kayamanan ng makasalanan, para sa matuwid ay nakalagak.

²³ Ang binungkal na lupa ng dukha ay maraming pagkaing ibinibigay, ngunit naaagaw iyon dahil sa kawalan ng katarungan.

²⁴ Ang hindi gumagamit ng pamalo ay napopoot sa anak niya, ngunit ang umiibig sa kanya ay matiyagang dumidisiplina.

²⁵ Ang matuwid ay may sapat upang masiyahan, ngunit ang tiyan ng masama ay mangangailangan.