Read Ang Bagong Ang Biblia Proverbs 15 Bible Online

Proverbs 15 - Ang Bagong Ang Biblia bible

Proverbs 15

¹ Nakapapawi ng poot ang sagot na malumanay, ngunit nagbubunsod sa galit ang salitang magaspang.

² Ang dila ng marunong ay nagbabadya ng kaalaman; ngunit ang bibig ng mga hangal ay nagbubuhos ng kahangalan.

³ Ang mga mata ng PANGINOON ay nasa bawat panig, sa masama at sa mabuti ay nagmamasid.

⁴ Punungkahoy ng buhay ang dilang mahinahon, ngunit nakakasira ng espiritu ang kalikuan niyon.

⁵ Hinahamak ng hangal ang turo ng kanyang ama, ngunit ang sumusunod sa pangaral ay may karunungan.

⁶ Sa bahay ng matuwid ay maraming kayamanan, ngunit sa mga pakinabang ng masama ay may dumarating nakaguluhan.

⁷ Ang mga labi ng marunong ay nagsasabog ng kaalaman, ngunit hindi gayon ang mga puso ng hangal.

⁸ Ang handog ng masama, sa PANGINOON ay kasuklamsuklam, ngunit ang dalangin ng matuwid ay kanyang kaluguran.

⁹ Ang lakad ng masama, sa PANGINOON ay kasuklamsuklam, ngunit iniibig niya ang sumusunod sa katuwiran.

¹⁰ May mabigat na disiplina sa taong lumilihis sa daan, at siyang namumuhi sa saway ay mamamatay.

¹¹ Ang Sheol at ang Abadon ay nakalantad sa PANGINOON; lalong higit pa ang puso ng mga tao!

¹² Ayaw ng manlilibak na siya'y maiwasto, siya'y hindi magtutungo sa matalino.

¹³ Ang masayang puso ay nagpapasaya ng mukha, ngunit sa kapanglawan ng puso ay nababagbag ang diwa.

¹⁴ Ang isip ng may unawa ay humahanap ng kaalaman, ngunit ang bibig ng mga hangal ay kumakain ng kahangalan.

¹⁵ Lahat ng mga araw ng naaapi ay kasamaan, ngunit siyang may masayahing puso ay laging may kapistahan.

¹⁶ Mas mabuti ang kaunti kung may takot sa PANGINOON, kaysa malaking kayamanan na may kaguluhan doon.

¹⁷ Mabuti pa ang pagkaing gulay na may pag-ibig, kaysa pinatabang baka na may poot na kalakip.

¹⁸ Ang mainiting tao ay nag-uudyok ng pagtatalo, ngunit siyang makupad sa galit ay nagpapahupa ng gulo.

¹⁹ Ang daan ng tamad ay napupuno ng mga dawag, ngunit ang landas ng matuwid ay isang lansangang patag.

²⁰ Ang matalinong anak ay nagpapasaya ng ama, ngunit hinahamak ng taong hangal ang kanyang ina.

²¹ Ang kahangalan ay kagalakan sa taong walang bait; ngunit ang may unawa ay lumalakad nang matuwid.

²² Kung walang payo mga panukala'y nawawalang-saysay, ngunit sa dami ng mga taga-payo sila'y nagtatagumpay.

²³ Kagalakan sa isang tao ang magbigay ng angkop na kasagutan, at ang salitang nasa tamang panahon ay anong inam!

²⁴ Para sa pantas ang landas ng buhay ay paitaas, upang sa Sheol na nasa sa ibaba siya ay makaiwas.

²⁵ Ginigiba ng PANGINOON ang bahay ng palalo, ngunit pinananatili niya ang hangganan ng babaing balo.

²⁶ Kasuklamsuklam sa PANGINOON ang masasamang panukala, ngunit nakakalugod sa kanya ang malilinis na salita.

²⁷ Siyang sakim sa masamang pakinabang ay gumagawa ng gulo sa kanyang sariling sambahayan, ngunit siyang namumuhi sa mga suhol ay mabubuhay.

²⁸ Ang puso ng matuwid ay nag-iisip ng isasagot, ngunit ang bibig ng masama ay masasama ang ibinubuhos.

²⁹ Ang PANGINOON ay malayo sa masama, ngunit kanyang dinirinig ang dalangin ng matuwid.

³⁰ Ang liwanag ng mga mata, sa puso'y nagpapasaya, at ang mabuting balita, sa mga buto'y nagpapasigla.

³¹ Ang taingang nakikinig sa mabuting payo, ay tatahang kasama ng matatalino.

³² Siyang tumatanggi sa turo ay humahamak sa sariling kaluluwa, ngunit siyang nakikinig sa pangaral ay nagtatamo ng unawa.

³³ Ang takot sa PANGINOON ay pagtuturo sa karunungan, at ang pagpapakumbaba ay nauuna sa karangalan.