Read Ang Bagong Ang Biblia Proverbs 19 Bible Online

Proverbs 19 - Ang Bagong Ang Biblia bible

Proverbs 19

¹ Mas mabuti ang dukha na lumalakad sa kanyang katapatan, kaysa isang taong masama ang pananalita, at isang hangal.

² Hindi mabuti para sa isang tao ang walang kaalaman, at siyang nagmamadali sa kanyang mga paa ay naliligaw.

³ Ang kahangalan ng tao ang sumisira sa kanyang landas, at ang kanyang puso ay nagagalit laban sa PANGINOON.

⁴ Ang kayamanan ay nagdaragdag ng maraming bagong kaibigan, ngunit ang dukha ay iniiwan ng kanyang kaibigan.

⁵ Ang bulaang saksi ay tiyak na parurusahan, at hindi makakatakas ang nagsasalita ng mga kasinungalingan.

⁶ Marami ang naghahangad ng pagpapala ng taong may magandang loob, at ang bawat tao'y kaibigan ng nagbibigay ng mga handog.

⁷ Kinamumuhian ang mahirap ng lahat ng kanyang kapatid, gaano pa kaya ang ilalayo sa kanya ng kanyang mga kaibigan! Kanyang hinahabol sila ng mga salita, ngunit wala na sila.

⁸ Siyang kumukuha ng karunungan ay umiibig sa sariling kaluluwa, siyang nag-iingat ng pang-unawa ay sasagana.

⁹ Ang sinungaling na saksi ay tiyak na parurusahan, at ang nagsasalita ng mga kasinungalingan ay mamamatay.

¹⁰ Hindi nababagay sa hangal ang mamuhay na marangya, lalo na sa alipin na sa mga pinuno ay mamahala.

¹¹ Ang matinong pag-iisip ng tao sa galit ay nagpapabagal, at kanyang kaluwalhatian na di pansinin ang kamalian.

¹² Ang poot ng hari ay parang ungal ng leon, ngunit parang hamog sa damo ang kanyang pagsang-ayon.

¹³ Ang hangal na anak, sa kanyang ama ay kasiraan, at ang pakikipagtalo ng asawa ay patuloy na pagpatak ng ulan.

¹⁴ Bahay at kayamanan ay minamana sa mga magulang, ngunit galing sa PANGINOON ang asawa na may katalinuhan.

¹⁵ Ang katamaran ay nagbubulid sa tulog na mahimbing; at ang taong tamad, gutom ay daranasin.

¹⁶ Ang nag-iingat ng utos ay kaluluwa niya ang iniingatan, ngunit ang humahamak sa salita ay mamamatay.

¹⁷ Ang mabait sa dukha ay sa PANGINOON nagpapautang, at ang kanyang mabuting gawa sa kanya ay babayaran.

¹⁸ Supilin mo ang iyong anak, habang may pag-asa; at huwag mong ilagak ang iyong puso sa ikapapahamak niya.

¹⁹ Ang taong may malaking poot sa parusa ay pagbabayarin, sapagkat kung iyong iligtas siya, muli mo lamang iyong gagawin.

²⁰ Makinig ka sa payo, at sa pangaral ay tumanggap, upang magtamo ka ng karunungan para sa hinaharap.

²¹ Sa puso ng isang tao, ang panukala'y marami, ngunit ang layunin ng PANGINOON ang siyang mananatili.

²² Ang kanais-nais sa isang tao ay ang kanyang katapatan, at ang isang dukha ay mas mabuti kaysa isang bulaan.

²³ Ang takot sa PANGINOON ay patungo sa buhay; at ang mayroon niyon ay magpapahingang may kasiyahan; hindi siya dadalawin ng kapinsalaan.

²⁴ Ibinabaon ng tamad ang kanyang kamay sa pinggan, at hindi niya ibabalik pa sa kanyang bibig man lamang.

²⁵ Saktan mo ang manlilibak, at ang walang muwang ay matututo ng karunungan; sawayin mo ang may unawa, at siya'y magkakaroon ng kaalaman.

²⁶ Ang gumagawa ng karahasan sa kanyang ama, at nagpapalayas sa kanyang ina, ay anak na nakakahiya at kakutyaan ang dala.

²⁷ Tumigil ka, anak ko, upang makinig ng aral upang hindi ka maligaw mula sa mga salita ng kaalaman.

²⁸ Ang walang kabuluhang saksi ay lumilibak sa katarungan, at ang bibig ng masama ay lumalamon ng kasamaan.

²⁹ Nakahanda sa mga manlilibak ang kahatulan, ang paghagupit ay sa mga likod ng mga hangal.