Read Ang Bagong Ang Biblia Proverbs 2 Bible Online

Proverbs 2 - Ang Bagong Ang Biblia bible

Proverbs 2

¹ Anak ko, kung ang mga salita ko'y iyong tatanggapin, at mga utos ko sa iyo ay iyong pagyayamanin,

² ikiling mo sa karunungan ang iyong pandinig, at sa pang-unawa ang puso mo'y ihilig.

³ Kung ikaw ay sumigaw upang makaalam, at itinaas ang iyong tinig upang makaunawa,

⁴ kung kagaya ng pilak, ito'y iyong hahanapin, at tulad ng nakatagong kayamanan, ito'y sasaliksikin,

⁵ kung magkagayo'y ang takot sa PANGINOON ay iyong mauunawaan, at ang kaalaman sa Diyos ay iyong matatagpuan.

⁶ Sapagkat ang PANGINOON ay nagbibigay ng karunungan, sa kanyang bibig nagmumula ang kaalaman at kaunawaan.

⁷ Pinaglalaanan niya ang matuwid ng magaling na karunungan, siya'y kalasag sa mga lumalakad na may katapatan,

⁸ upang mabantayan niya ang mga landas ng katarungan, at maingatan ang daan ng kanyang mga banal.

⁹ Kung magkagayo'y mauunawaan mo ang katuwiran, ang katarungan at ang katapatan, bawat mabuting daan.

¹⁰ Sapagkat papasok sa iyong puso ang karunungan, at magiging kaaya-aya sa iyong kaluluwa ang kaalaman.

¹¹ Ang mabuting pagpapasiya ang magbabantay sa iyo, ang pagkaunawa ang mag-iingat sa iyo.

¹² Iligtas ka nito sa daan ng kasamaan, mula sa mga taong nagsasalita ng masasamang bagay;

¹³ na nagpapabaya sa mga landas ng katuwiran, upang lumakad sa mga daan ng kadiliman;

¹⁴ na nagagalak sa paggawa ng kasamaan, at sa mga kalikuan ng kasamaan ay nasisiyahan;

¹⁵ na mga lihis sa kanilang mga lakad, at mga suwail sa kanilang mga landas.

¹⁶ Sa masamang babae ikaw ay maliligtas, mula sa mapakiapid at sa mga salita niyang binibigkas,

¹⁷ na nagpapabaya sa kasamahan ng kanyang kabataan, at ang tipan ng kanyang Diyos ay kanyang kinalilimutan;

¹⁸ sapagkat ang kanyang bahay ay lumulubog sa kamatayan, at ang kanyang mga landas tungo sa mga kadiliman;

¹⁹ walang naparoroon sa kanya na nakakabalik muli, ni ang mga landas ng buhay ay kanilang nababawi.

²⁰ Kaya't ang lakad ng mabubuting tao ang iyong lakaran, at ang mga landas ng matuwid ang iyong pakaingatan.

²¹ Sapagkat ang matuwid sa lupain ay mamamalagi, at ang walang sala doon ay mananatili.

²² Ngunit ang masama ay tatanggalin sa lupain, at ang mga taksil doon ay bubunutin.