Read Ang Bagong Ang Biblia Proverbs 20 Bible Online

Proverbs 20 - Ang Bagong Ang Biblia bible

Proverbs 20

¹ Ang alak ay manunuya, ang matapang na inumin ay manggugulo; at sinumang naililigaw nito ay hindi matalino.

² Ang matinding poot ng hari ay parang ungal ng leon; ang gumagalit sa kanya ay nagkakasala laban sa kanyang buhay.

³ Karangalan para sa isang tao ang umiwas sa alitan; ngunit bawat hangal ay makikipag-away.

⁴ Ang tamad ay hindi nag-aararo sa tagginaw; siya'y maghahanap sa anihan, at walang matatagpuan.

⁵ Ang layunin sa puso ng tao ay parang malalim na tubig; ngunit sa taong may kaunawaan, ito'y kanyang iniigib.

⁶ Maraming tao ang naghahayag ng sariling katapatan, ngunit sinong makakatagpo ng taong tapat?

⁷ Ang taong matuwid na lumalakad sa katapatan niya — mapapalad ang kanyang mga anak na susunod sa kanya!

⁸ Ibinubukod ng haring nakaupo sa trono ng kahatulan sa pamamagitan ng kanyang mga mata, ang lahat ng kasamaan.

⁹ Sinong makapagsasabi, "Puso ko'y aking nalinisan; ako'y malinis mula sa aking kasalanan"?

¹⁰ Iba't ibang panimbang, at iba't ibang sukatan, parehong sa PANGINOON ay karumaldumal.

¹¹ Ang bata man ay nakikilala sa pamamagitan ng kanyang mga gawa, kung ang kanyang ginagawa ay malinis at tama.

¹² Ang nakikinig na tainga, at ang nakakakitang mata, ang PANGINOON ang parehong gumawa sa kanila.

¹³ Huwag mong ibigin ang pagtulog, baka humantong ka sa kahirapan, imulat mo ang iyong mga mata, at mabubusog ka ng tinapay.

¹⁴ "Walang halaga, walang halaga," sabi ng mamimili; ngunit kapag nakalayo na siya, saka siya magmamalaki.

¹⁵ Mayroong ginto, at napakaraming mga batong mahal, ngunit mahalagang hiyas ang mga labi ng kaalaman.

¹⁶ Kunin mo ang suot ng taong nananagot sa di kilala; at tanggapan mo ng sangla ang nananagot sa mga banyaga.

¹⁷ Matamis sa isang tao ang tinapay na nakuha sa pandaraya, ngunit pagkatapos, ang kanyang bibig ay mapupuno ng graba.

¹⁸ Natatatag sa pamamagitan ng payo ang bawat panukala; sa pamamagitan ng matalinong patnubay ikaw ay makipagdigma.

¹⁹ Ang naghahatid ng tsismis ay naghahayag ng mga lihim; kaya't ang nagsasalita ng kahangalan ay huwag mong kasamahin.

²⁰ Kung sumumpa sa kanyang ama o sa kanyang ina ang sinuman, ang kanyang ilawan ay papatayin sa pusikit na kadiliman.

²¹ Ang mana na madaling nakuha sa pasimula, sa katapusan ay hindi mapagpapala.

²² Huwag mong sabihin, "Ang masama'y aking gagantihan," maghintay ka sa PANGINOON, at ikaw ay kanyang tutulungan.

²³ Ang paiba-ibang panimbang, sa PANGINOON ay karumaldumal, at hindi mabuti ang madadayang timbangan.

²⁴ Ang mga lakad ng tao ay sa PANGINOON; paano ngang mauunawaan ng tao ang kanyang lakad?

²⁵ Isang bitag sa tao ang padalus-dalos na magsabi, "Ito ay banal," at pagkatapos gumawa ng mga panata, saka pa magbubulay-bulay.

²⁶ Ibinubukod ng matalinong hari ang masama, at sa gulong sila'y ipinasasagasa.

²⁷ Ilawan ng PANGINOON ang espiritu ng tao, na sumisiyasat ng kaloob-looban nito.

²⁸ Ang nagpapanatili sa hari ay katapatan at katotohanan, at ang kanyang trono ay inaalalayan ng katuwiran.

²⁹ Ang kaluwalhatian ng mga kabataan ay ang kanilang kalakasan, at ang kagandahan ng matatanda ay ang ulo nilang may uban.

³⁰ Ang mga latay na sumusugat ay lumilinis ng kasamaan; at ang mga hampas ay nagpapadalisay sa kaloob-looban.