Read Ang Bagong Ang Biblia Proverbs 24 Bible Online

Proverbs 24 - Ang Bagong Ang Biblia bible

Proverbs 24

¹ Huwag kang maiinggit sa taong masasama, ni maghangad man na sila'y makasama.

² Sapagkat ang kanilang puso ay nagbabalak ng karahasan, at ang kanilang mga labi ay nagsasalita ng kalikuan.

³ Sa pamamagitan ng karunungan ay naitatayo ang bahay; at naitatatag sa pamamagitan ng kaunawaan.

⁴ Napupuno ang mga silid sa pamamagitan ng kaalaman, ng lahat ng mahahalaga at kaaya-ayang kayamanan.

⁵ Ang taong pantas ay mas makapangyarihan kaysa sa malakas, at ang taong may kaalaman kaysa sa may kalakasan.

⁶ Sapagkat maaari kang makidigma kapag may matalinong pamamatnubay, at sa karamihan ng mga tagapayo ay mayroong tagumpay.

⁷ Ang karunungan ay napakataas para sa isang hangal; hindi niya ibinubuka ang kanyang bibig sa may pintuang-bayan.

⁸ Siyang nagbabalak ng paggawa ng kasamaan, ay tatawaging manggagawa ng kalokohan.

⁹ Ang pagbabalak ng kahangalan ay kasalanan, at ang manlilibak, sa mga tao ay karumaldumal.

¹⁰ Kung manlupaypay ka sa araw ng kahirapan, maliit ang iyong kalakasan.

¹¹ Iligtas mo silang dinadala sa kamatayan, pigilan mo silang natitisod patungo sa katayan.

¹² Kung iyong sinasabi, "Narito, hindi namin ito nalalaman." Hindi ba niya alam ang sa mga puso'y tumitimbang? At siyang nagbabantay sa iyong kaluluwa, hindi ba niya nalalaman? At ang bawat tao ayon sa gawa niya ay di ba niya gagantihan?

¹³ Anak ko, kumain ka ng pulot, sapagkat ito'y mainam, at matamis sa iyong panlasa ang tulo ng pulot-pukyutan.

¹⁴ Alamin mo na gayon sa iyo ang karunungan; kung ito'y iyong matagpuan, mayroong kinabukasan, at ang iyong pag-asa ay hindi mahihiwalay.

¹⁵ Tulad ng masamang tao, ang tahanan ng matuwid ay huwag mong tambangan, huwag mong gawan ng dahas ang kanyang tahanan.

¹⁶ Sapagkat ang matuwid ay makapitong nabubuwal at bumabangon na naman, ngunit ang masama ay nabubuwal sa pamamagitan ng kasakunaan.

¹⁷ Kapag nabubuwal ang iyong kaaway ay huwag kang magalak, at huwag matuwa ang iyong puso kapag siya'y bumabagsak;

¹⁸ baka ito'y makita ng PANGINOON, at ikagalit niya, at kanyang alisin ang poot niya sa kanya.

¹⁹ Huwag kang mayamot dahil sa mga gumagawa ng kasamaan, at ang masamang tao ay huwag mong kainggitan.

²⁰ Sapagkat ang masamang tao'y walang bukas na haharapin, at ang ilawan ng masama ay papatayin.

²¹ Anak ko, sa PANGINOON at sa hari ay matakot ka, sa mga pabagu-bago ay huwag kang makisama.

²² Sapagkat biglang dumarating mula sa kanila ang kapahamakan, at ang pagkawasak na nagmumula sa kanila, ay sinong nakakaalam?

²³ Ang mga ito ay mga kasabihan din ng pantas: Ang pagtatangi sa paghatol ay hindi mabuti.

²⁴ Siyang nagsasabi sa masama, "Matuwid ka," ay susumpain ng mga bayan, kapopootan ng mga bansa;

²⁵ ngunit silang sumasaway sa masama ay magkakaroon ng tuwa, at sa kanila'y darating ang mabuting pagpapala.

²⁶ Ang nagbibigay ng tamang sagot ay humahalik sa mga labi.

²⁷ Ihanda mo sa labas ang iyong gawa, at ihanda mo para sa sarili mo sa parang; at pagkatapos ay gawin mo ang iyong bahay.

²⁸ Huwag kang sumaksi laban sa iyong kapwa nang walang kadahilanan; at sa pamamagitan ng iyong mga labi ay huwag kang manlinlang.

²⁹ Huwag mong sabihin, "Gagawin ko sa kanya ang ginawa niya sa akin; kung anong ginawa niya, iyon ang igaganti ko sa kanya."

³⁰ Sa bukid ng tamad ako'y napadaan, at sa ubasan ng taong salat sa katinuan;

³¹ at, narito, tinubuang lahat ng mga tinik, ang ibabaw niyon ay natatakpan ng mga dawag, at ang batong bakod nito ay bumagsak.

³² Pagkatapos ay nakita ko at aking pinag-isipan, ako'y tumingin at tumanggap ng pangaral.

³³ Kaunting tulog, kaunti pang pag-idlip, kaunting paghahalukipkip ng mga kamay upang magpahinga,

³⁴ at darating ang iyong karalitaan na parang magnanakaw; at ang kahirapan na parang taong may sandata.