Read Ang Bagong Ang Biblia Proverbs 25 Bible Online

Proverbs 25 - Ang Bagong Ang Biblia bible

Proverbs 25

¹ Ang mga ito ay mga kawikaan din ni Solomon, na sinipi ng mga tauhan ni Hezekias na hari ng Juda.

² Kaluwalhatian ng Diyos na ang mga bagay ay ilihim, ngunit kaluwalhatian ng mga hari na ang mga bagay ay saliksikin.

³ Gaya ng langit sa kataasan, at ng lupa sa kalaliman, gayon ang isipan ng mga hari ay di masiyasat.

⁴ Ang dumi sa pilak ay iyong alisin, at ang panday para sa isang kasangkapan ay may gagamitin;

⁵ alisin ang taong masama sa harapan ng hari, at ang kanyang luklukan ay matatatag sa katuwiran.

⁶ Sa harapan ng hari ay huwag kang mangunguna, at huwag kang tatayo sa lugar ng mga taong dakila,

⁷ sapagkat mas mabuting sabihan ka, "Umakyat ka rito," kaysa ibaba ka sa harapan ng pangulo. Ang nakita ng iyong mga mata,

⁸ huwag mo kaagad dalhin sa hukuman; sapagkat anong gagawin mo sa wakas niyon, kapag ikaw ay hiniya ng iyong kapwa?

⁹ Ipaglaban mo ang iyong usapin sa harap ng iyong kapwa, at huwag mong ihayag ang lihim ng iba;

¹⁰ baka ang nakakarinig sa iyo ay dalhan ka ng kahihiyan, at hindi magwakas ang iyong kasiraan.

¹¹ Ang naaangkop na salitang binitawan, ay gaya ng mga mansanas na ginto sa pilak na lalagyan.

¹² Tulad ng singsing na ginto, at palamuting gintong dalisay, sa nakikinig na tainga ang pantas na tagasaway.

¹³ Tulad ng lamig ng niyebe sa panahon ng anihan, ang tapat na sugo sa kanila na nagsugo sa kanya, sapagkat kanyang pinagiginhawa ang espiritu ng mga panginoon niya.

¹⁴ Tulad ng mga ulap at hangin na walang ulan, ang taong naghahambog ng kanyang kaloob na hindi niya ibinibigay.

¹⁵ Sa pamamagitan ng pagtitiyaga maaaring mahikayat ang pinuno, at ang malumanay na dila ay bumabali ng buto.

¹⁶ Kung nakasumpong ka ng pulot, kumain ka ng sapat sa iyo, baka ikaw ay masuya, at ito'y isuka mo.

¹⁷ Dapat paminsan-minsan lamang ang paa mo sa bahay ng iyong kapwa, baka siya'y magsawa sa iyo, at kamuhian ka.

¹⁸ Ang taong sumasaksi ng kasinungalingan laban sa kanyang kapwa-tao ay tulad ng batuta, o isang tabak, o ng isang matulis na palaso.

¹⁹ Ang pagtitiwala sa taong di tapat sa panahon ng kagipitan, ay gaya ng sirang ngipin, at ng paang nabalian.

²⁰ Ang umaawit ng mga awit sa pusong mabigat, ay tulad ng nag-aalis ng damit sa panahon ng tagginaw, at tulad ng suka sa sugat.

²¹ Kung ang iyong kaaway ay gutom, bigyan mo siya ng makakain; at kung siya'y uhaw, bigyan mo siya ng tubig na iinumin;

²² sapagkat magbubunton ka sa ulo niya ng mga baga ng apoy, at gagantimpalaan ka ng PANGINOON.

²³ Ang hanging amihan ay ulan ang hatid; at ang mapanirang dila, mga tingin na may galit.

²⁴ Mas mabuti ang tumira sa isang sulok ng bubungan, kaysa sa isang bahay na kasama ng isang babaing palaaway.

²⁵ Tulad ng malamig na tubig sa uhaw na kaluluwa, gayon ang mabuting balita na sa malayong lupain nagmula.

²⁶ Tulad ng malabong balon at maruming bukal, ang taong matuwid na sa masama'y nagbibigay daan.

²⁷ Ang kumain ng napakaraming pulot ay hindi mabuti, at hindi kapuri-puri na hanapin ang papuri sa sarili.

²⁸ Siyang hindi nagpipigil ng kanyang sarili, ay parang lunsod na winasak at walang pader na nalabi.