Read Ang Bagong Ang Biblia Proverbs 28 Bible Online

Proverbs 28 - Ang Bagong Ang Biblia bible

Proverbs 28

¹ Ang masama ay tumatakas gayong wala namang humahabol; ngunit ang mga matuwid ay matatapang na parang leon.

² Kapag ang lupain ay naghihimagsik, marami ang kanyang mga pinuno; ngunit kapag ang pinuno ay may unawa at kaalaman, magpapatuloy ang katatagan nito.

³ Ang dukha na umaapi sa dukha, ay bugso ng ulan na walang pagkaing iniiwan.

⁴ Silang nagpapabaya sa kautusan ay nagpupuri sa masama; ngunit ang nag-iingat ng kautusan ay nakipaglaban sa kanila.

⁵ Ang masasamang tao ay hindi nakakaunawa ng katarungan, ngunit silang nagsisihanap sa PANGINOON ay nakakaunawa nito nang lubusan.

⁶ Mas mabuti ang dukha na lumalakad sa kanyang katapatan, kaysa taong mayaman na liko sa kanyang mga daan.

⁷ Matalinong anak ang tumutupad sa kautusan, ngunit ang kasama ng matatakaw, sa kanyang ama ay kahihiyan.

⁸ Ang nagpapalago ng kanyang yaman sa pamamagitan ng labis na patubo, ay nagtitipon para sa iba na mabait sa dukha.

⁹ Ang naglalayo ng kanyang pandinig sa pakikinig ng kautusan, maging ang kanyang panalangin ay karumaldumal.

¹⁰ Sinumang nagliligaw sa matuwid tungo sa masamang daan, ay siya ring mahuhulog sa kanyang sariling hukay; ngunit ang sakdal ay magmamana ng kabutihan.

¹¹ Ang mayamang tao ay marunong sa ganang kanyang sarili, ngunit ang dukha na may unawa ay nagsusuri.

¹² Kapag ang matuwid ay nagtatagumpay, may dakilang kaluwalhatian; ngunit kapag ang masama ay bumabangon, ang mga tao'y nagkukublihan.

¹³ Siyang nagtatakip ng kanyang mga pagsuway ay hindi sasagana, ngunit ang nagpapahayag at tumatalikod sa mga iyon ay magtatamo ng awa.

¹⁴ Mapalad ang tao na sa PANGINOON ay natatakot tuwina, ngunit siyang nagmamatigas ng kanyang puso ay mahuhulog sa sakuna.

¹⁵ Tulad ng umuungal na leon at ng osong sumasalakay, gayon ang masamang pinuno sa maralitang bayan.

¹⁶ Ang pinunong kulang sa pang-unawa ay isang malupit na manlulupig, ngunit siyang namumuhi sa kasakiman, kanyang mga araw ay lalawig.

¹⁷ Kung ang isang tao'y nagpapasan ng dugo ng sinuman, hayaan siyang maging takas hanggang kamatayan; huwag siyang tulungan ng sinuman.

¹⁸ Maliligtas ang lumalakad sa katapatan, ngunit ang baluktot sa kanyang mga lakad ay mahuhulog sa hukay.

¹⁹ Siyang nagbubungkal ng kanyang lupain ay magkakaroon ng saganang tinapay; ngunit siyang sumusunod sa mga walang kabuluhang gawa ay maghihirap nang lubusan.

²⁰ Ang taong tapat ay sasagana sa pagpapala; ngunit siyang nagmamadali sa pagyaman ay tiyak na parurusahan.

²¹ Hindi mabuti ang may kinikilingan; ngunit gagawa ng masama ang isang tao dahil sa isang pirasong tinapay.

²² Ang kuripot ay nagmamadali sa pagyaman, at hindi nalalaman na darating sa kanya ang kasalatan.

²³ Siyang sumasaway sa isang tao ay makakasumpong sa ibang araw ng higit na pagpapala, kaysa sa taong kunwari'y pumupuri sa pamamagitan ng dila.

²⁴ Ang nagnanakaw sa kanyang ama o sa kanyang ina, at nagsasabi, "Hindi ito masama," ay kasamahan ng maninira.

²⁵ Nag-uudyok ng away ang taong sakim, ngunit ang nagtitiwala sa PANGINOON ay payayamanin.

²⁶ Siyang nagtitiwala sa kanyang sariling puso ay hangal; ngunit maliligtas ang lumalakad na may katalinuhan.

²⁷ Siyang nagbibigay sa dukha ay hindi kakapusin, ngunit siyang nagkukubli ng kanyang mga mata, sa sumpa'y pararamihin.

²⁸ Kapag ang masama ay bumabangon, ang mga tao'y nagkukubli, ngunit kapag sila'y namatay, ang matuwid ay dumarami.