Read Ang Bagong Ang Biblia Proverbs 31 Bible Online

Proverbs 31 - Ang Bagong Ang Biblia bible

Proverbs 31

¹ Ang mga salita ni Haring Lemuel; na itinuro sa kanya ng kanyang ina:

² Ano, anak ko? Ano, O anak ng aking bahay-bata? Ano, O anak ng aking mga panata?

³ Huwag mong ibigay ang iyong lakas sa mga babae, o ang iyong mga lakad sa mga lumilipol ng mga hari.

⁴ Hindi para sa mga hari, O Lemuel, hindi para sa mga hari ang uminom ng alak, ni para sa mga pinuno ang magnais ng matapang na alak;

⁵ baka sila'y uminom, at makalimutan ang itinakdang kautusan, at baluktutin ang karapatan ng lahat ng nahihirapan.

⁶ Bigyan mo ng matapang na inumin ang malapit nang mamamatay, at ng alak ang nasa mapait na kaguluhan;

⁷ hayaan silang uminom at lumimot sa kanilang kahirapan, at huwag nang alalahanin pa ang kanilang kasawian.

⁸ Buksan mo ang iyong bibig alang-alang sa pipi, para sa karapatan ng lahat ng naiwang walang kandili.

⁹ Buksan mo ang iyong bibig, humatol ka nang may katuwiran, at ipagtanggol mo ang karapatan ng dukha at nangangailangan.

¹⁰ Sinong makakatagpo ng isang butihing babae? Sapagkat siya'y higit na mahalaga kaysa mga batong rubi.

¹¹ Ang puso ng kanyang asawa, sa kanya'y nagtitiwala, at siya'y hindi kukulangin ng mapapala.

¹² Gumagawa siya ng mabuti sa kanya at hindi kasamaan sa lahat ng mga araw ng kanyang buhay.

¹³ Siya'y humahanap ng balahibo ng tupa at lino, at kusang loob ang kanyang mga kamay ay nagtatrabaho.

¹⁴ Siya'y gaya ng mga sasakyang dagat ng mangangalakal, nagdadala siya ng kanyang pagkain mula sa kalayuan.

¹⁵ Siya'y bumabangon samantalang gabi pa, at naghahanda ng pagkain para sa kanyang pamilya, at nagtatakda ng mga gawain sa mga babaing alila niya.

¹⁶ Tinitingnan niya ang isang bukid at ito'y binibili niya, sa bunga ng kanyang mga kamay ay nagtatanim siya ng ubasan.

¹⁷ Binibigkisan niya ng lakas ang kanyang mga balakang, at pinalalakas ang kanyang mga bisig.

¹⁸ Kanyang nababatid na kikita ang kanyang kalakal, ang kanyang ilaw sa gabi ay hindi namamatay.

¹⁹ Kanyang inilalagay ang kanyang mga kamay sa panulid, at ang kanyang mga kamay ay humahawak ng panghabi.

²⁰ Binubuksan niya sa mga dukha ang kanyang kamay, iniaabot niya ang kanyang mga kamay sa nangangailangan.

²¹ Hindi siya natatakot sa niyebe para sa sambahayan niya, sapagkat ang buo niyang sambahayan ay nakadamit na pula.

²² Gumagawa siya ng mga saplot para sa sarili, ang kanyang pananamit ay pinong lino at kulay ube.

²³ Kilala ang kanyang asawa sa mga pintuang bayan, kapag siya'y nauupong kasama ng matatanda sa lupain.

²⁴ Gumagawa siya ng mga kasuotang lino at ito'y ipinagbibili, at nagbibigay ng mga pamigkis sa mga negosyante.

²⁵ Kalakasan at dangal ang kanyang kasuotan, at ang panahong darating ay kanyang tinatawanan.

²⁶ Binubuka niya ang kanyang bibig na may karunungan; at nasa kanyang dila ang aral ng kabaitan.

²⁷ Kanyang tinitingnang mabuti ang mga lakad ng kanyang sambahayan, at hindi siya kumakain ng tinapay ng katamaran.

²⁸ Tumatayo ang kanyang mga anak, at tinatawag siyang mapalad; gayundin ang kanyang asawa, at kanyang pinupuri siya:

²⁹ "Maraming anak na babae ang nakagawa ng kabutihan, ngunit silang lahat ay iyong nahigitan."

³⁰ Ang alindog ay madaya, at ang ganda ay walang kabuluhan, ngunit ang babaing natatakot sa PANGINOON ay papupurihan.

³¹ Bigyan siya ng bunga ng kanyang mga kamay, at purihin siya ng kanyang mga gawa sa mga pintuang bayan.