Read Ang Bagong Ang Biblia Proverbs 5 Bible Online

Proverbs 5 - Ang Bagong Ang Biblia bible

Proverbs 5

¹ Anak ko, pakinggan mo ang aking karunungan; ikiling mo ang iyong pandinig sa aking kaunawaan;

² upang mabuting pagpapasiya ay iyong maingatan, at upang ang iyong mga labi ay makapagbantay ng kaalaman.

³ Sapagkat ang mga labi ng mapangalunyang babae sa pulot ay tumatagas, at ang kanyang pananalita kaysa langis ay madulas;

⁴ ngunit mapait na gaya ng halamang lason sa bandang wakas, tabak na may dalawang talim ang siyang kasintalas.

⁵ Ang kanyang mga paa sa kamatayan ay palusong; ang kanyang mga hakbang ay nakahawak sa Sheol.

⁶ Hindi siya tumatahak sa landas ng buhay; ang kanyang mga lakad ay di panatag, at hindi niya ito nalalaman.

⁷ Ngayon nga, mga anak, sa akin kayo'y makinig, at huwag kayong lumayo sa mga salita ng aking bibig.

⁸ Ilayo mo sa kanya ang iyong daan, at huwag kang lumapit sa pintuan ng kanyang bahay;

⁹ baka ibigay mo ang iyong karangalan sa iba, at ang iyong mga taon sa mga walang awa.

¹⁰ Baka mga dayuhan ang magtamasa sa iyong kayamanan, at mapunta sa bahay ng di kilala ang iyong pinagpaguran.

¹¹ At ikaw ay manangis sa katapusan ng iyong buhay, kapag naubos ang iyong laman at katawan.

¹² At iyong sasabihin, "Tunay na ang pangaral ay aking kinamuhian, at hinamak ng aking puso ang pagsaway!

¹³ Hindi ko sinunod ang tinig ng aking mga tagapagturo, o ikiniling ko man ang aking pandinig sa aking mga guro.

¹⁴ Ako'y nasa bingit ng lubos na kapahamakan, sa gitna ng kapisanan at ng kapulungan."

¹⁵ Sa iyong sariling tipunan ng tubig ikaw ay uminom, sa umaagos na tubig mula sa iyong sariling balon.

¹⁶ Dapat bang kumalat ang iyong mga bukal, at ang mga agos ng tubig sa mga lansangan?

¹⁷ Hayaan mong maging para sa sarili mo lamang, at hindi para sa mga kasama mong mga dayuhan.

¹⁸ Pagpalain ang iyong bukal; at magalak ka sa asawa ng iyong kabataan.

¹⁹ Gaya ng magandang usa at mahinhing babaing usa, bigyan kang kasiyahan ng dibdib niya sa tuwina, at sa kanyang pag-ibig ay laging malugod ka.

²⁰ Sapagkat, bakit anak ko, sa mapangalunyang babae ay malulugod ka, at yayakap sa dibdib ng babaing banyaga?

²¹ Sapagkat ang mga lakad ng tao ay nasa harap ng mga mata ng PANGINOON, at kanyang sinisiyasat ang lahat niyang mga landas.

²² Ang masama'y nabibitag sa sarili niyang kasamaan, at siya'y nahuhuli sa mga tali ng kanyang kasalanan.

²³ Siya'y mamamatay sa kakulangan ng disiplina, at dahil sa kanyang kahangalan ay naliligaw siya.