Read Ang Bagong Ang Biblia Proverbs 7 Bible Online

Proverbs 7 - Ang Bagong Ang Biblia bible

Proverbs 7

¹ Anak ko, ang mga salita ko'y iyong ingatan, at ang aking mga utos ay iyong pahalagahan.

² Sundin mo ang aking mga utos at mabubuhay ka; ingatan mo ang aking aral na parang itim ng iyong mata.

³ Sa iyong mga daliri ay iyong itali, sa ibabaw ng iyong puso ay isulat mo.

⁴ Sabihin mo sa karunungan, "Ikaw ay aking kapatid na babae," at tawagin mong kamag-anak ang kaunawaan;

⁵ upang maingatan ka mula sa babaing masama, sa babaing mapangalunya na may matatamis na salita.

⁶ Sapagkat sa bintana ng aking bahay ay tumingin ako sa aking dungawan,

⁷ at ako'y tumingin sa mga walang muwang, ako'y nagmasid sa mga kabataan, may isang kabataang walang katinuan,

⁸ na dumaraan sa lansangan na malapit sa kanyang panulukan, at siya'y humayo sa daan na patungo sa kanyang bahay,

⁹ sa pagtatakipsilim, sa kinagabihan, sa oras ng gabi at kadiliman.

¹⁰ At, narito, siya'y sinalubong ng isang babae, na nakagayak tulad ng isang upahang babae, at tuso sa puso.

¹¹ Siya'y matigas ang ulo at maingay, ang kanyang mga paa ay hindi tumitigil sa bahay;

¹² ngayo'y nasa mga lansangan, mamaya'y nasa pamilihan, at siya'y nag-aabang sa bawat panulukan.

¹³ Sa gayo'y hinahawakan niya ang lalaki at hinahagkan siya, at may mukhang walang hiya na nagsasabi sa kanya,

¹⁴ "Kailangan kong mag-alay ng mga handog pangkapayapaan, sa araw na ito ang mga panata ko'y aking nagampanan.

¹⁵ Kaya't lumabas ako upang salubungin ka, masigasig kong hinanap ang iyong mukha, at natagpuan kita.

¹⁶ Ginayakan ko ng mga panlatag ang higaan ko, na yari sa kinulayang lino mula sa Ehipto.

¹⁷ At aking pinabanguhan ang aking kama, ng mira, aloe, at kanela.

¹⁸ Halika, magpakabusog tayo sa pag-ibig hanggang sa kinaumagahan; magpakasaya tayo sa paglalambingan.

¹⁹ Sapagkat ang aking asawa ay wala sa bahay, sa malayong lugar siya'y naglakbay;

²⁰ siya'y nagdala ng isang supot ng salapi; sa kabilugan ng buwan pa siya uuwi."

²¹ Sa maraming mapanuksong salita kanyang nahikayat siya, sa malumanay niyang labi siya'y kanyang nahila.

²² Pagdaka ay sumusunod siya sa kanya, gaya ng toro na sa katayan pupunta, o gaya ng isang nasisilong usa,

²³ hanggang sa ang isang palaso'y sa bituka niya tumagos, gaya ng ibong sa bitag ay humahangos; na hindi nalalamang kanyang buhay ay matatapos.

²⁴ Ngayon nga, mga anak, dinggin ninyo ako, sa mga salita ng aking bibig ay makinig kayo.

²⁵ Huwag ibaling ang iyong puso sa kanyang mga lakad, huwag kang maliligaw sa kanyang mga landas.

²⁶ Sapagkat napakarami na niyang itinumba, oo, lubhang marami na siyang naging biktima.

²⁷ Daang patungo sa Sheol ang kanyang bahay, pababa sa mga silid ng kamatayan.