Read Ang Bagong Ang Biblia Isaiah 11 Bible Online

Isaiah 11 - Ang Bagong Ang Biblia bible

Isaiah 11

¹ May usbong na lalabas mula sa tuod ni Jesse, at sisibol ang isang sanga mula sa kanyang mga ugat.

² At ang Espiritu ng PANGINOON ay sasakanya, ang diwa ng karunungan at ng unawa, ang diwa ng payo at ng kapangyarihan, ang diwa ng kaalaman at ng takot Panginoon;

³ at ang kanyang kalulugdan ay ang takot sa PANGINOON. Hindi siya hahatol ng ayon sa nakikita ng kanyang mga mata, ni magpapasiya man ng ayon sa narinig ng kanyang mga tainga.

⁴ Kundi sa katuwiran ay hahatulan niya ang dukha, at magpapasiya na may karampatan para sa maaamo sa lupa. Sasaktan niya ang lupa ng pamalo ng kanyang bibig, at sa hinga ng kanyang mga labi ay kanyang papatayin ang masama.

⁵ Katuwiran ang magiging bigkis ng kanyang baywang, at katapatan ang pamigkis ng kanyang mga balakang.

⁶ At ang asong-gubat ay maninirahang kasama ng kordero, at mahihigang kasiping ng batang kambing ang leopardo, ang guya, ang batang leon, at ang patabain ay magkakasama; at papatnubayan sila ng munting bata.

⁷ Ang baka at ang oso ay manginginain; ang kanilang mga anak ay mahihigang magkakasiping; at ang leon ay kakain ng dayami na gaya ng baka.

⁸ Ang batang pasusuhin ay maglalaro sa lungga ng ahas, at ang batang kahihiwalay sa suso ay isusuot ang kanyang kamay sa lungga ng ulupong.

⁹ Hindi sila mananakit o maninira man sa aking buong banal na bundok: sapagkat ang lupa ay mapupuno ng kaalaman ng PANGINOON, gaya ng tubig na tumatakip sa dagat.

¹⁰ At sa araw na iyon ang ugat ni Jesse ay tatayo bilang sagisag ng mga bayan, siya ay hahanapin ng mga bansa; at ang kanyang tirahan ay magiging maluwalhati.

¹¹ At sa araw na iyon ay muling iuunat ng PANGINOON ang kanyang kamay upang mabawi ang nalabi sa kanyang bayan, mula sa Asiria, Ehipto, Patros, Etiopia, mula sa Elam, Shinar, Hamat, at mula sa mga lupain sa baybayin ng dagat.

¹² Siya'y maglalagay ng sagisag para sa mga bansa, at titipunin niya ang mga ipinatapon mula sa Israel, at titipunin ang mga nangalat ng Juda mula sa apat na sulok ng lupa.

¹³ Ang paninibugho ng Efraim ay maaalis, ang panliligalig ng Juda ay tatanggalin, ang Efraim ay hindi maninibugho sa Juda, at ang Juda ay hindi manliligalig sa Efraim.

¹⁴ Ngunit sila'y lulusob sa mga Filisteo sa kanluran, at magkasamang mananamsam sila sa mga tao ng silangan. Kanilang iuunat ang kanilang kamay sa Edom at sa Moab; at susundin sila ng mga anak ni Ammon.

¹⁵ At lubos na wawasakin ng PANGINOON ang dila ng dagat ng Ehipto; at iwawasiwas ang kanyang kamay sa Ilog ng kanyang nakakapasong hangin, at gagawing pitong daluyan, at gumawa ng daan upang makaraang naglalakad;

¹⁶ at magkakaroon ng isang lansangan mula sa Asiria, para sa nalabi sa kanyang bayan, gaya ng nangyari sa Israel nang araw na sila'y umahon mula sa lupain ng Ehipto.