Read Ang Bagong Ang Biblia Isaiah 14 Bible Online

Isaiah 14 - Ang Bagong Ang Biblia bible

Isaiah 14

¹ Ang PANGINOON ay maaawa sa Jacob, at muling pipiliin ang Israel, at ilalagay sila sa kanilang sariling lupain. Ang dayuhan ay makikisama sa kanila, at sila'y mapapasama sa sambahayan ni Jacob.

² At kukunin sila ng mga tao, at dadalhin sila sa kanilang dako; at aariin sila ng sambahayan ng Israel sa lupain ng PANGINOON bilang mga aliping lalaki at babae. Kanilang bibihagin sila na bumihag sa kanila at mamumuno sa kanila na umapi sa kanila.

³ Kapag bibigyan ka na ng PANGINOON ng kapahingahan mula sa iyong kahirapan, kabagabagan, at sa mabigat na paglilingkod na ipinapaglingkod mo,

⁴ ay iyong dadalhin ang pagkutyang ito laban sa hari ng Babilonia: "Huminto na ang pang-aapi! Huminto na ang matinding kalapastanganan!

⁵ Binali ng PANGINOON ang tungkod ng masama, ang setro ng mga pinuno;

⁶ na nagpahirap sa mga tao sa pamamagitan ng poot ng walang tigil na bugbog, na namuno sa mga bansa sa galit, na may walang tigil na pag-uusig.

⁷ Ang buong lupa ay tiwasay at tahimik; sila'y biglang nagsisiawit.

⁸ Ang mga puno ng sipres ay nagagalak dahil sa iyo, at ang mga sedro sa Lebanon, na nagsasabi, 'Mula nang ikaw ay ibagsak, wala nang mamumutol na umaahon laban sa amin.'

⁹ Ang Sheol sa ibaba ay kinilos upang salubungin ka sa iyong pagdating; pinupukaw nito ang mga lilim upang batiin ka, ang lahat na mga pinuno ng lupa; itinatayo nito mula sa kanilang mga trono, ang lahat na hari ng mga bansa.

¹⁰ Silang lahat ay magsasalita at magsasabi sa iyo: 'Pati ba ikaw ay naging mahinang gaya namin? Ikaw ba'y naging gaya namin?'

¹¹ Ang iyong kahambugan ay ibinaba sa Sheol pati na ang tunog ng iyong mga alpa; ang uod ay higaan sa ilalim mo, at ang mga uod ang iyong pantakip.

¹² "Ano't nahulog ka mula sa langit, O Tala sa Umaga, anak ng Umaga! Paanong ikaw ay lumagpak sa lupa, ikaw na siyang nagpabagsak sa mga bansa!

¹³ Sinabi mo sa iyong puso, 'Ako'y aakyat sa langit; sa itaas ng mga bituin ng Diyos aking itatatag ang aking trono sa itaas; ako'y uupo sa bundok na pinagtitipunan, sa malayong hilaga.

¹⁴ Ako'y aakyat sa itaas ng mga kaitaasan ng mga ulap, gagawin ko ang aking sarili na gaya ng Kataas-taasan.'

¹⁵ Gayunma'y ibinaba ka sa Sheol, sa mga pinakamalalim na bahagi ng Hukay.

¹⁶ Silang nakakakita sa iyo ay magsisititig sa iyo, at mag-iisip tungkol sa iyo: 'Ito ba ang lalaki na nagpayanig ng lupa, na nagpauga ng mga kaharian;

¹⁷ na ginawang gaya ng ilang ang sanlibutan, at gumiba ng mga bayan nito; na hindi nagpahintulot sa kanyang mga bilanggo upang magsiuwi?'

¹⁸ Lahat ng mga hari ng mga bansa ay nahihiga sa kaluwalhatian, bawat isa'y sa kanyang sariling libingan.

¹⁹ Ngunit ikaw ay itinapon papalayo sa iyong libingan na gaya ng kasuklamsuklam na sanga, binihisang kasama ng mga patay, ang mga tinaga ng tabak, na bumaba sa mga bato ng Hukay, gaya ng bangkay na nayapakan ng paa.

²⁰ Ikaw ay hindi mapapasama sa kanila sa libingan, sapagkat sinira mo ang iyong lupain, pinatay mo ang iyong bayan. "Ang angkan nawa ng mga gumagawa ng kasamaan ay huwag nang tawagin magpakailanman!

²¹ Maghanda kayong patayin ang kanilang mga anak dahil sa kasamaan ng kanilang mga magulang; baka sila'y magsibangon at angkinin ang lupain, at punuin ng mga lunsod ang ibabaw ng lupa."

²² "At ako'y babangon laban sa kanila," sabi ng PANGINOON ng mga hukbo, "at tatanggalin ko sa Babilonia ang pangalan at ang nalabi, at ang anak at ang anak ng anak," sabi ng PANGINOON.

²³ "Iyon ay aking gagawing ari-arian ng hayop na erizo, at mga lawa ng tubig, at aking papalisin ng walis ng pagkawasak, sabi ng PANGINOON ng mga hukbo."

²⁴ Ang PANGINOON ng mga hukbo ay sumumpa: "Gaya ng aking binalak, gayon ang mangyayari; at gaya ng aking pinanukala, gayon ang mananatili.

²⁵ Aking lalansagin ang taga-Asiria sa aking lupain, at sa aking mga bundok ay yayapakan ko siya sa ilalim ng paa; kung magkagayo'y maaalis ang kanyang pamatok sa kanila, at ang ipinasan niya sa kanilang balikat."

²⁶ Ito ang panukala na ipinanukala tungkol sa buong lupa; at ito ang kamay na iniunat sa lahat ng mga bansa.

²⁷ Sapagkat pinanukala ng PANGINOON ng mga hukbo, at sinong magpapawalangbisa nito? Ang kanyang kamay ay nakaunat, at sinong mag-uurong nito?

²⁸ Dumating ang pahayag na ito nang taong mamatay si Haring Ahaz.

²⁹ "Ikaw ay huwag magalak, O Filistia, kayong lahat, sa pagkabali ng pamalo na sumakit sa iyo; sapagkat sa ahas ay lalabas ang ulupong, at ang kanyang anak ay magiging mabangis na ahas na lumilipad.

³⁰ At ang panganay ng dukha ay kakain, at ang nangangailangan ay nahihigang tiwasay; ngunit aking papatayin ng taggutom ang iyong ugat, at ang nalabi sa iyo ay aking papatayin.

³¹ Ikaw ay tumaghoy, O pintuan, ikaw ay sumigaw, O lunsod; matunaw ka sa takot, O Filistia, kayong lahat! Sapagkat lumalabas ang usok mula sa hilaga, at walang pagala-gala sa kanyang mga kasamahan."

³² Ano nga ang isasagot sa mga sugo ng bansa? "Itinayo ng PANGINOON ang Zion, at sa kanya ay nanganganlong ang nagdadalamhati sa kanyang bayan."