Read Ang Bagong Ang Biblia Isaiah 3 Bible Online

Isaiah 3 - Ang Bagong Ang Biblia bible

Isaiah 3

¹ Sapagkat, inaalis ng Makapangyarihan, ng PANGINOON ng mga hukbo, sa Jerusalem at sa Juda ang panustos at tungkod, ang lahat na panustos na tinapay at ang lahat na panustos na tubig;

² ang magiting na lalaki at ang mandirigma ang hukom at ang propeta, ang manghuhula at ang matanda;

³ ang kapitan ng limampu, at ang marangal na tao, ang tagapayo, at ang bihasang salamangkero, at ang dalubhasa sa pag-eengkanto.

⁴ Gagawin kong pinuno nila ang mga batang lalaki, at ang mga sanggol ang mamumuno sa kanila.

⁵ Aapihin ng mga tao ang isa't isa, bawat isa'y ang kanyang kapwa, ang kabataan ay magpapalalo laban sa matanda at ang hamak laban sa marangal.

⁶ Kapag hinawakan ng lalaki ang kanyang kapatid sa bahay ng kanyang ama, na nagsasabi: "Ikaw ay may damit, ikaw ay maging aming pinuno, at ang wasak na ito ay mapapasailalim ng iyong pamamahala";

⁷ sa araw na iyon ay magsasalita siya na nagsasabi: "Hindi ako magiging tagapagpagaling; sa aking bahay ay wala kahit tinapay o damit man; huwag ninyo akong gawing pinuno ng bayan."

⁸ Sapagkat ang Jerusalem ay giba, at ang Juda ay bumagsak; sapagkat ang kanilang pananalita at ang kanilang mga gawa ay laban sa PANGINOON, na nilalapastangan ang kanyang maluwalhating presensiya.

⁹ Ang kanilang pagtatangi ng mga tao ay sumasaksi laban sa kanila; at kanilang ipinahahayag ang kanilang mga kasalanan na gaya ng Sodoma, hindi nila ikinukubli ito. Kahabag-habag sila! Sapagkat sila'y nagdala ng kasamaan sa kanilang sarili.

¹⁰ Sabihin ninyo sa matuwid, na iyon ay sa ikabubuti nila, sapagkat sila'y kakain ng bunga ng kanilang mga gawa.

¹¹ Kahabag-habag ang masama! Ikasasama nila iyon, sapagkat ang ginawa ng kanyang mga kamay ay gagawin sa kanya.

¹² Tungkol sa aking bayan, mga bata ang nang-aapi sa kanila, at ang mga babae ang namumuno sa kanila. O bayan ko, inililigaw kayo ng inyong mga pinuno, at ginugulo ang daan ng iyong mga landas.

¹³ Ang PANGINOON ay tumayo upang magsanggalang, kinuha niya ang kanyang lugar upang ang kanyang bayan ay hatulan.

¹⁴ Ang PANGINOON ay papasok sa paghatol kasama ng matatanda at mga pinuno ng kanyang bayan: "Kayo ang lumamon ng ubasan, ang samsam ng mga dukha ay nasa inyong mga bahay.

¹⁵ Anong ibig ninyong sabihin na inyong dinudurog ang aking bayan, at ginigiling ang mukha ng mga dukha?" sabi ng Panginoong DIYOS ng mga hukbo.

¹⁶ Sinabi ng PANGINOON: Sapagkat ang mga anak na babae ng Zion ay mapagmataas, at nagsisilakad na may naghahabaang mga leeg, at mga matang nagsisiirap, na lumalakad na pakendeng-kendeng habang humahayo, at ipinapadyak ang kanilang mga paa;

¹⁷ kaya't sasaktan ng PANGINOON ang bao ng ulo ng mga anak na babae ng Zion, at ilalantad ng PANGINOON ang kanilang mga lihim na bahagi.

¹⁸ Sa araw na iyon ay aalisin ng PANGINOON ang mga hiyas ng kanilang mga paa, at ang mga hiyas ng ulo, at ang mga pahiyas na may hugis ng kalahating buwan;

¹⁹ ang mga kuwintas, ang mga pulseras, at ang mga belo;

²⁰ ang mga laso ng buhok, ang mga palamuti sa braso, ang mga pamigkis, ang mga sisidlan ng pabango, at ang mga anting-anting,

²¹ ang mga singsing, ang mga hiyas na pang-ilong;

²² ang mga damit na pamista, ang mga balabal, ang mga kapa, ang mga pitaka;

²³ ang maninipis na kasuotan, ang pinong lino, ang mga turbante, at ang mga belo.

²⁴ Sa halip na maiinam na pabango ay kabulukan; at sa halip na pamigkis ay lubid; at sa halip na ayos na buhok ay kakalbuhan; at sa halip na pamigkis na maganda ay pamigkis na damit-sako; kahihiyan sa halip na kagandahan.

²⁵ Ang iyong mga lalaki ay mabubuwal sa pamamagitan ng tabak, at ang iyong magigiting ay sa pakikipagdigma.

²⁶ At ang kanyang mga pintuan ay tataghoy at tatangis; at siya'y wasak na uupo sa ibabaw ng lupa.