Read Ang Bagong Ang Biblia Isaiah 31 Bible Online

Isaiah 31 - Ang Bagong Ang Biblia bible

Isaiah 31

¹ Kahabag-habag sila na sa Ehipto ay lumulusong upang humingi ng tulong, at umaasa sa mga kabayo; na nagtitiwala sa mga karwahe sapagkat marami sila, at sa mga mangangabayo sapagkat napakalakas nila, ngunit hindi sila nagtitiwala sa Banal ng Israel, o sumasangguni man sa PANGINOON!

² Gayunman siya'y pantas at nagdadala ng kapahamakan, hindi niya iniurong ang kanyang mga salita, kundi mag-aalsa laban sa sambahayan ng mga gumagawa ng kasamaan, at laban sa tumutulong sa mga gumagawa ng kasamaan.

³ Ang mga Ehipcio ay mga tao, at hindi Diyos; at ang kanilang mga kabayo ay laman, at hindi espiritu. Kapag iniunat ng PANGINOON ang kanyang kamay, siyang tumutulong ay matitisod, at siyang tinutulungan ay mabubuwal, at silang lahat ay samasamang mapapahamak.

⁴ Sapagkat ganito ang sabi ng PANGINOON sa akin, Kung paanong ang leon at ang batang leon ay umuungal sa kanyang biktima, at kapag ang isang pangkat ng mga pastol ay tinatawag laban sa kanya, ay hindi natatakot sa kanilang sigaw, o naduduwag man dahil sa kanilang ingay, gayon bababa ang PANGINOON ng mga hukbo upang lumaban sa Bundok ng Zion, at sa burol niyon.

⁵ Gaya ng mga ibong nagsisilipad gayon iingatan ng PANGINOON ng mga hukbo ang Jerusalem; iyon ay kanyang iingatan at ililigtas, kanyang ililigtas at iingatan iyon.

⁶ Kayo'y manumbalik sa kanya na inyong pinaghimagsikang lubha, O mga anak ni Israel.

⁷ Sapagkat sa araw na iyon ay itatapon ng bawat tao ang kanyang mga diyus-diyosang pilak, at ang kanyang mga diyus-diyosang ginto, na ginawa ng inyong mga kamay na para sa inyo ay naging kasalanan.

⁸ "Kung magkagayo'y mabubuwal ang taga-Asiria sa pamamagitan ng tabak, hindi sa tao; at ang tabak, na hindi sa mga tao, ang lalamon sa kanya; at kanyang tatakasan ang tabak, at ang kanyang mga binata ay ilalagay sa sapilitang paggawa.

⁹ Ang kanyang bato ay mawawala dahil sa pagkasindak, at ang kanyang mga pinuno ay manginginig sa watawat," sabi ng PANGINOON, na ang kanyang apoy ay nasa Zion, at ang kanyang hurno ay nasa Jerusalem.