Read Ang Bagong Ang Biblia Isaiah 48 Bible Online

Isaiah 48 - Ang Bagong Ang Biblia bible

Isaiah 48

¹ Pakinggan mo ito, O sambahayan ni Jacob, na tinatawag sa pangalan ng Israel, at lumabas mula sa balakang ng Juda; na sumumpa sa pangalan ng PANGINOON, at nagpahayag sa Diyos ng Israel, ngunit hindi sa katotohanan, o sa katuwiran man.

² (Sapagkat tinatawag nila ang kanilang mga sarili ayon sa lunsod na banal, at nagtiwala sa Diyos ng Israel; ang PANGINOON ng mga hukbo ang kanyang pangalan).

³ "Aking ipinahayag ang mga dating bagay mula nang una, iyon ay lumabas sa aking bibig, at aking ipinakilala; at bigla kong ginawa at ang mga iyon ay nangyari.

⁴ Sapagkat alam ko, na ikaw ay mapagmatigas, at ang iyong leeg ay parang litid na bakal, at ang iyong noo ay parang tanso,

⁵ aking ipinahayag sa iyo mula nang una; bago nangyari ay ipinaalam ko sa iyo, baka iyong sabihin, 'Mga diyus-diyosan ko ang gumawa ng mga ito, ang aking larawang inanyuan at ang aking larawang hinulma, ang nag-utos sa kanila.'

⁶ "Iyong narinig; ngayo'y tingnan mong lahat ito; at hindi mo ba ipahahayag? Mula sa panahong ito ay magpaparinig ako sa iyo ng mga bagong bagay, mga kubling bagay na hindi mo pa nalalaman.

⁷ Ang mga ito ay nilikha ngayon, at hindi noong una; bago dumating ang araw na ito ay hindi mo pa iyon narinig; baka iyong sabihin, 'Aking nalaman ang mga ito.'

⁸ Oo, hindi mo pa narinig, hindi mo pa nalalaman; mula nang una ang iyong pandinig ay hindi pa nabuksan. Sapagkat alam ko na ikaw ay gagawa ng may kataksilan, at tinawag na suwail mula sa iyong pagsilang.

⁹ "Alang-alang sa aking pangalan ay iniurong ko ang galit ko, at dahil sa kapurihan ko ay pinigil ko iyon para sa iyo, upang hindi kita ihiwalay.

¹⁰ Dinalisay kita, ngunit hindi tulad ng pilak; sinubok kita sa hurno ng kapighatian.

¹¹ Alang-alang sa akin, alang-alang sa akin, aking gagawin iyon; sapagkat paanong lalapastanganin ang aking pangalan? At ang kaluwalhatian ko sa iba'y di ko ibinigay.

¹² "Makinig ka sa akin, O Jacob, at Israel na tinawag ko; ako nga; ako ang una, ako rin ang huli.

¹³ Ang aking kamay ang siyang naglagay ng pundasyon ng lupa, at ang aking kanan ang siyang nagladlad ng mga langit; kapag ako'y tumatawag sa kanila, sila'y nagsisitayong magkakasama.

¹⁴ "Kayo'y magtipon, kayong lahat, at pakinggan ninyo! Sino sa kanila ang nagpahayag ng mga bagay na ito? Minamahal siya ng PANGINOON; kanyang tutuparin ang kanyang mabuting hangarin sa Babilonia, at ang kanyang kamay ay magiging laban sa mga Caldeo.

¹⁵ Ako, ako nga'y nagsalita; oo, aking tinawag siya; aking dinala siya, at kanyang pagtatagumpayin ang mga lakad niya.

¹⁶ Kayo'y lumapit sa akin, pakinggan ninyo ito: mula sa pasimula ay hindi ako nagsalita ng lihim, mula nang panahon na nangyari ito ay naroon na ako." At ngayo'y sinugo ako ng Panginoong DIYOS at ng kanyang Espiritu.

¹⁷ Ganito ang sabi ng PANGINOON, ng inyong Manunubos, ang Banal ng Israel: "Ako ang PANGINOON mong Diyos, na nagtuturo sa iyo para sa iyong kapakinabangan, na pumapatnubay sa iyo sa daan na dapat mong lakaran.

¹⁸ O kung dininig mo sana ang aking mga utos! Ang iyong kapayapaan sana ay naging parang ilog, at ang iyong katuwiran ay parang mga alon sa dagat;

¹⁹ Ang iyong lahi sana ay naging parang buhangin at ang iyong mga supling ay parang mga butil niyon; ang kanilang pangalan ay hindi tatanggalin o mawawasak man sa harapan ko."

²⁰ Kayo'y lumabas sa Babilonia, tumakas kayo sa Caldea, ipahayag ninyo ito sa tinig ng sigaw ng kagalakan, ipahayag ninyo ito, ibalita ninyo hanggang sa dulo ng lupa; inyong sabihin, "Tinubos ng PANGINOON si Jacob na kanyang lingkod!"

²¹ At sila'y hindi nauhaw nang patnubayan niya sila sa mga ilang; kanyang pinaagos ang tubig mula sa bato para sa kanila; kanyang nilagyan ng guwang ang bato, at ang tubig ay bumukal.

²² "Walang kapayapaan para sa masama," sabi ng PANGINOON.