Read Ang Bagong Ang Biblia Leviticus 27 Bible Online

Leviticus 27 - Ang Bagong Ang Biblia bible

Leviticus 27

¹ At nagsalita ang PANGINOON kay Moises, na sinasabi,

² "Magsalita ka sa mga anak ni Israel, at sabihin mo sa kanila: Kapag ang isang tao ay gumawa ng isang maliwanag na panata sa PANGINOON tungkol sa katumbas ng isang tao,

³ ang katumbas para sa isang lalaki ay: mula sa dalawampung taong gulang hanggang sa may animnapu ay limampung siklong pilak, na ihahalaga ayon sa siklo ng santuwaryo.

⁴ Kapag babae, ang katumbas ay tatlumpung siklo.

⁵ Kung may gulang na mula sa limang taon hanggang sa may dalawampung taon, ang itutumbas mo ay dalawampung siklo ang sa lalaki at ang sa babae ay sampung siklo.

⁶ Kung may gulang na mula sa isang buwan hanggang sa limang taon, tutumbasan mo ng limang siklong pilak para sa lalaki at sa babae ay tatlong siklong pilak.

⁷ Kung may gulang na animnapung taon pataas ay labinlimang siklo ang iyong itutumbas para sa lalaki at sa babae ay sampung siklo.

⁸ Ngunit kung siya ay mas dukha kaysa inyong itinakdang katumbas, siya ay patatayuin sa harapan ng pari, at tutumbasan siya ng pari; siya ay tutumbasan ng pari ayon sa kakayahan niya na may panata.

⁹ "At kung tungkol sa hayop na ihahandog na alay sa PANGINOON, lahat ng ibibigay sa PANGINOON ay banal.

¹⁰ Huwag niyang babaguhin o papalitan ang mabuti ng masama o ang masama ng mabuti; at kung sa anumang paraan ay palitan ng iba ang isang hayop, kapwa magiging banal ang kapalit at ang pinalitan.

¹¹ At kung iyon ay alinmang hayop na marumi na hindi maihahandog na alay sa PANGINOON, dadalhin niya ang hayop sa harapan ng pari;

¹² at ito ay hahalagahan ng pari kung ito ay mabuti o masama; ayon sa paghahalaga ng pari ay magiging gayon.

¹³ Ngunit kung tunay na kanyang tutubusin, magdaragdag siya ng ikalimang bahagi sa ibinigay mong halaga.

¹⁴ "Kapag ang isang tao ay magtatalaga ng kanyang bahay upang maging banal sa PANGINOON, ay hahalagahan ito ng pari, kung mabuti o masama; ayon sa ihahalaga ng pari ay magiging gayon.

¹⁵ At kung tutubusin ng nagtalaga ang kanyang bahay, siya ay magdaragdag ng ikalimang bahagi ng salapi na inihalaga roon, at ito ay magiging kanya.

¹⁶ "Kapag ang isang tao ay magtatalaga sa PANGINOON ng bahagi ng bukid na kanyang minana, ang iyong paghahalaga ay ayon sa binhi nito; isang omer na binhi ng sebada sa halagang limampung siklong pilak.

¹⁷ Kung itatalaga niya ang kanyang bukid mula sa taon ng pagdiriwang, ito ay magiging ayon sa iyong inihalaga.

¹⁸ Subalit kung italaga niya ang kanyang bukid pagkatapos ng pagdiriwang, bibilangin sa kanya ng pari ang salapi ayon sa mga taong natitira hanggang sa taon ng pagdiriwang at ito ay ibabawas sa iyong inihalaga.

¹⁹ Kung ang bukid ay tutubusin ng nagtalaga nito, siya ay magdaragdag ng ikalimang bahagi ng salaping inihalaga roon, at ito ay mapapasa kanya.

²⁰ At kung hindi niya tubusin ang bukid, o kung ipinagbili niya ang bukid sa ibang tao, ito ay hindi na matutubos.

²¹ Subalit ang bukid, kapag naalis sa pagdiriwang, ay magiging banal sa PANGINOON, bilang bukid na itinalaga. Ito ay magiging pag-aari ng pari.

²² At kung ang sinuman ay magtalaga sa PANGINOON ng bukid na kanyang binili, na hindi sa bukid na kanyang minana;

²³ ay bibilangin sa kanya ng pari ang halaga ng iyong inihalaga hanggang sa taon ng pagdiriwang, at babayaran niya ang iyong inihalaga ng araw ding iyon, isang banal na bagay sa PANGINOON.

²⁴ Sa taon ng pagdiriwang, ibabalik ang bukid sa kanyang binilhan, sa kanya na nagmamay-ari ng lupa.

²⁵ Lahat ng iyong paghahalaga ay magiging ayon sa siklo ng santuwaryo: bawat isang siklo ay katumbas ng labinlimang gramo.

²⁶ "Gayunman, walang sinumang magtatalaga ng panganay sa mga hayop. Ito ay panganay para sa PANGINOON, maging baka o tupa ay para sa PANGINOON.

²⁷ At kung ito ay hayop na marumi, ito ay kanyang tutubusin ayon sa iyong inihalaga at idaragdag ang ikalimang bahagi niyon; o kung hindi tutubusin ay ipagbibili ayon sa iyong inihalaga.

²⁸ "Ngunit anumang bagay na itinalaga sa PANGINOON mula sa lahat ng kanyang pag-aari, maging sa tao o sa hayop, o sa bukid na kanyang pag-aari, ay hindi maipagbibili o matutubos; bawat bagay na itinalaga ay kabanal-banalan sa PANGINOON.

²⁹ Walang taong itinalaga sa pagkawasak ang matutubos; siya ay tiyak na papatayin.

³⁰ "Lahat ng ikasampung bahagi ng lupain, maging sa binhi ng lupain, o sa bunga ng punungkahoy ay sa PANGINOON; ito ay banal sa PANGINOON.

³¹ Kung ang isang tao ay tutubos ng alinman sa kanyang ikasampung bahagi, idagdag niya roon ang ikalimang bahagi niyon.

³² At lahat ng ikasampung bahagi sa bakahan o sa kawan, lahat ng ikasampung bahagi na dumaan sa ilalim ng tungkod ng pastol ay banal sa PANGINOON.

³³ Huwag niyang sisiyasatin kung mabuti o masama, ni huwag niya itong papalitan; at kung palitan niya ito, kapwa magiging banal ito at ang ipinalit at hindi ito maaaring tubusin."

³⁴ Ito ang mga utos na iniutos ng PANGINOON kay Moises sa bundok ng Sinai para sa mga anak ni Israel.