Read Ang Bagong Ang Biblia Leviticus 6 Bible Online

Leviticus 6 - Ang Bagong Ang Biblia bible

Leviticus 6

¹ Nagsalita ang PANGINOON kay Moises, na sinasabi:

² "Kung ang sinuman ay magkasala at sumuway sa PANGINOON sa pamamagitan ng pandaraya sa kanyang kapwa tungkol sa isang habilin, o sa isang sangla, o sa pagnanakaw, o pangingikil sa kanyang kapwa,

³ o nakatagpo ng nawawalang bagay at nagsinungaling tungkol doon, at sumumpa ng kasinungalingan tungkol sa alinman sa lahat ng ito na ginawa ng tao, at nagkasala;

⁴ kapag siya'y nagkasala at naunawaan na niya ang kanyang kasalanan, isasauli niya ang ninakaw, o ang nakuha sa pangingikil, o ang habiling inihabilin sa kanya, o ang bagay na nawala na kanyang natagpuan,

⁵ o lahat ng bagay na kanyang sinumpaan ng kabulaanan. Isasauli niya itong buo at daragdagan pa niya ng ikalimang bahagi niyon sa kaninumang nagmamay-ari sa araw ng kanyang handog para sa budhing maysala.

⁶ Dadalhin niya sa pari ang kanyang handog para sa budhing maysala sa PANGINOON, ang isang tupang lalaki na walang kapintasan na mula sa kawan, ayon sa iyong halagang itinakda para sa isang handog para sa budhing maysala.

⁷ Ang pari ay gagawa ng pagtubos para sa kanya sa harapan ng PANGINOON tungkol sa bagay na kanyang nagawa at napatunayang nagkasala; siya ay patatawarin."

⁸ Ang PANGINOON ay nagsalita kay Moises, na sinasabi:

⁹ "Iutos mo ito kay Aaron at sa kanyang mga anak: Ito ang kautusan tungkol sa handog na sinusunog. Ang handog na sinusunog ay mananatili sa ibabaw ng dambana sa buong magdamag hanggang umaga, samantalang ang apoy sa dambana ay pananatilihing nagniningas doon.

¹⁰ At isusuot ng pari ang kanyang mahabang kasuotang lino sa ibabaw ng kanyang mga pang-ilalim na lino kasunod ng kanyang katawan; at kukunin niya ang mga abo ng handog na sinusunog na sinunog sa apoy sa ibabaw ng dambana, at ilalagay niya sa tabi ng dambana.

¹¹ Pagkatapos nito, maghuhubad siya ng kanyang mga suot at magbibihis ng ibang mga kasuotan, at ilalabas ang mga abo sa kampo sa isang malinis na pook.

¹² Ang apoy sa ibabaw ng dambana ay pananatilihing nagniningas doon, at hindi ito papatayin. Ang pari ay magsusunog ng kahoy sa ibabaw niyon tuwing umaga, at aayusin niya sa ibabaw niyon ang handog na kanyang susunugin, at kanyang susunugin ito kasama ang taba ng mga handog pangkapayapaan.

¹³ Ang apoy ay pananatilihing nagniningas sa ibabaw ng dambana; hindi ito papatayin.

¹⁴ "Ito ang kautusan tungkol sa butil na handog: dadalhin ito ng mga anak ni Aaron sa harapan ng PANGINOON, sa harap ng dambana.

¹⁵ Kukuha siya roon ng isang dakot ng magandang uri ng harina at ng langis ng butil na handog, at ng lahat na kamanyang na nasa ibabaw ng handog. Ito ay susunugin bilang bahaging alaala sa ibabaw ng dambana, isang mabangong samyo sa PANGINOON.

¹⁶ Ang nalabi sa handog ay kakainin ni Aaron at ng kanyang mga anak. Ito ay kakainin na walang pampaalsa sa dakong banal; kakainin nila ito sa bulwagan ng toldang tipanan.

¹⁷ Hindi ito lulutuing may pampaalsa. Aking ibinigay iyon bilang kanilang bahagi mula sa handog sa akin na pinaraan sa apoy; ito ay kabanal-banalan gaya ng handog pangkasalanan at handog para sa budhing maysala.

¹⁸ Bawat lalaki sa mga anak ni Aaron ay kakain niyon mula sa handog sa PANGINOON na pinaraan sa apoy. Ito ay iniutos magpakailanman sa buong panahon ng inyong salinlahi. Sinumang humipo sa mga iyon ay magiging banal."

¹⁹ Ang PANGINOON ay nagsalita kay Moises, na sinasabi:

²⁰ "Ito ang alay ni Aaron at ng kanyang mga anak na kanilang ihahandog sa PANGINOON sa araw na siya'y buhusan ng langis: ang ikasampung bahagi ng isang efa ng piling harina bilang isang nagpapatuloy na butil na handog, ang kalahati nito ay sa umaga at ang kalahati ay sa hapon.

²¹ Ito ay gagawin sa kawaling may langis; ito ay mamasahing mabuti at pipira-pirasuhin tulad sa butil na handog, at ihahandog ito bilang mabangong samyo sa PANGINOON.

²² Ang paring mula sa mga anak ni Aaron na binuhusan ng langis upang humalili sa kanya ay maghahandog niyon gaya ng ipinag-utos ng PANGINOON magpakailanman; ito ay susunuging buo.

²³ Bawat butil na handog ng pari ay susunuging buo, hindi ito kakainin."

²⁴ Ang PANGINOON ay nagsalita kay Moises, na sinasabi:

²⁵ "Sabihin mo kay Aaron at sa kanyang mga anak, ito ang kautusan tungkol sa handog pangkasalanan: sa dakong pinagpapatayan ng handog na sinusunog ay doon papatayin sa harapan ng PANGINOON ang handog pangkasalanan; ito ay kabanal-banalang bagay.

²⁶ Ang paring naghandog niyon para sa kasalanan ay kakain niyon. Ito ay kakainin sa banal na dako sa bulwagan ng toldang tipanan.

²⁷ Lahat ng humipo ng laman niyon ay magiging banal; at kapag tumilamsik ang dugo sa damit, ang natilamsikan ay lalabhan sa banal na dako.

²⁸ Ang palayok na pinaglagaan nito ay babasagin; at kung ito'y inilaga sa sisidlang tanso, ito ay lilinisin at babanlawan ng tubig.

²⁹ Bawat lalaki sa mga pari ay kakain niyon; ito ay kabanal-banalan.

³⁰ At alinmang handog pangkasalanan na ang dugo'y ipinasok sa toldang tipanan upang ipantubos sa santuwaryo ay huwag kakainin. Ito ay susunugin ng apoy.